Sumqayıt Regional Mədəniyyət İdarəsinin 2022-ci ildə ilk müşavirəsindən sonra hər bir regionda baş məsləhətçilərin iştirakı ilə iclaslar keçirilir. Abşeron Rayon Mədəniyyət Mərkəzində təşkil olunan iclasda Sumqayıt Regional Mədəniyyət İdarəsinin Abşeron rayonu üzrə nümayəndəsi - baş məsləhətçi, Əməkdar mədəniyyət işçisi İlham Manafov və rayonda fəaliyyət göstərən mədəniyyət müəssisələrinin rəhbərləri iştirak ediblər.
İdarədən AZƏRTAC-a bildirilib ki, iclasda 2022-ci ilin Prezident İlham Əliyev tərəfindən "Şuşa İli" elan edilməsi ilə bağlı Sumqayıt Regional Mədəniyyət İdarəsinə tabeli Şuşa mədəniyyət müəssisələri ilə birgə əməkdaşlıq çərçivəsində genişmiqyaslı tədbirlərin hazırlanması ilə bağlı təkliflər müzakirə olunub.
Müəssisə rəhbərləri 2021-ci ildə görülmüş işlər barədə hesabatlarını verib, cari ildə keçiriləcək tədbirlərin icrası ilə bağlı təkliflərlə çıxış ediblər.
Bildirilib ki, görülən işlərlə yanaşı, mədəniyyət işçiləri rayonda yaşayan şəhid ailələri və qaziləri tez-tez ziyarət edir, onların gündəlik problemləri ilə də maraqlanırlar.
