“Sevinc paylaşdıqca çoxalar” deyiblər. Qayğıya ehtiyacı olan insanları bayramda yada salmaq, onları sevindirmək insanlığa yaraşacaq ən gözəl addımdır. Builki Novruz bayramı ərəfəsində Xırdalan şəhər 5 nömrəli tam orta məktəbin təşkilatçılığı ilə Saray 2 saylı sağlamlıq imkanları məhdud uşaqlar üçün Sosial Xidmət Müəssisəsində Novruz şənliyi keçirilib.
Şənlikdə müəssisəsinin direktoru Pərvanə Səfərova, Abşeron rayon İcra Hakimiyyətinin əməkdaşı Hafiz Mikayılov və 5 nömrəli məktəbin pedoqoji kollektivi iştirak ediblər.
P.Səfərova uşaqlara göstərilən diqqət qayğıya görə rayon rəhbərliyinə, məktəbin kollektivinə təşəkkürünü bildirərək bu kimi tədbirlərin yeniyetmələrin yadında uzun müddət qaldığını və onların cəmiyyətə adaptasiyasına müsbət təsir etdiyini qeyd edib.
Balacalara bayram təravəti arzulayan məktəbin direktoru Şahin Yusifov isə əlavə edib ki, dövlətimizin imkanları genişləndikcə isə xüsusi qayğıya ehtiyacı olan vətəndaşlara diqqət və qayğı da artır.
Tədbirdə müəssisənin sakinləri sevindirilib, onlar üçün bayram süfrəsi açılıb, Novruz sovqatı təqdim edilib.
Qonaqların bayram hədiyyələrindən razı qalan uşaqlar bahara aid müxtəlif mahnılar səsləndirib, müxtəlif rəqs nömrələrini təqdim ediblər.
Şamo Əliyev
