Əmək və Əhalinin Sosial Müdafiəsi Nazirliyi 2018-ci il üçün əlilliyi olan şəxslərin istirahətinin təşkili işlərinə başlayıb və 90 əlil xüsusi ayrılmış nəqliyyat vasitəsi ilə Lənkəran rayonundakı istirahət mərkəzinə göndərilib.
Nazirliyin ictimaiyyətlə əlaqələr şöbəsindən verilən məlumata görə, istirahətə yola salınanlar ölkəmizdə əlilliyi olan vətəndaşların sosial müdafiəsinin gücləndirilməsi üçün aparılan işlərin onlarda məmnunluq hissi doğurduğunu, hərtərəfli dövlət qayğısı ilə əhatə olunduqlarını, habelə ölkəmizin gözəl təbiətə malik guşələrində istirahət etmək üçün şərait yaradıldığına görə ölkə Prezidenti İlham Əliyevə dərin minnətdarlıqlarını ifadə ediblər.
Əmək və Əhalinin Sosial Müdafiəsi Nazirliyinin “2018-ci ildə əlilliyi olan şəxslərin və sağlamlıq imkanları məhdud uşaqların sosial müdafiəsi və reabilitasiyası Proqramı” onların cəmiyyətə inteqrasiyası, tibbi bərpa olunmalarına kömək göstərilməsi, bədən tərbiyəsi və idmana cəlb edilmələri, asudə vaxtlarının təşkili, sosial müdafiəsinin gücləndirilməsi üçün cari ildə həyata keçirilməsi nəzərdə tutulan tədbirləri əhatə edir. Əlillərin istirahətə göndərilməsi də həmin Proqrama uyğun olaraq onların asudə vaxtlarının səmərəli təşkili məqsədinə yönəlib.
Bu il 1100 nəfərdən çox əlilin ölkəmizin səfalı guşələrindəki istirahət mərkəzlərinə göndərilməsi nəzərdə tutulur.
