2018-ci il may ayının 28-də müsəlman Şərqində ilk parlamentli respublikanın – Azərbaycan Xalq Cümhuriyyətinin yaranmasının 100 illiyi tamam olur. Bu münasibətlə Abşeron rayonunun bütün ümütəhsil müəssisələrində silsilə tədbirlərin keçirilməsinə başlanılıb. Novxanı qəsəbə 1 nömrəli tam orta məktəbdə keçirilən tədbirdə öz möhtəşəmliyi ilə yadda qalıb. Azərbaycan Xalq Cümhuriyyətinin yaranmasının 100 illiyi ilə bağlı Abşeron rayonu Mehdi Hüseyzadə adına Novxanı kənd 1 nömrəli tam orta məktəbdə möhtəşəm tədbir təşkil olundu.
Tədbirdə Rayon Təhsil şöbəsinin rəhbərliyi, məktəb direktorları , ziyalılar və təhsil müəssisəsinin pedeqoji kollektivi yaxından iştirak etdilər.
Əvvəlcə tədbir məktəbin həyətində ucaldılan üç rəngli bayrağımızın qaldırılması ilə start götürdü. Al əlvan geyimli şagirdlər dövrə vuraq rəks etdilər və sülh rəmzi sayılan göyərçinləri səmaya buraxdılar.
Daha sonra tədbir iştirakçıları təhsil müəssisəsinin tarix muzeyi ilə yaxından tanış oldular. İştirakçılara burada qorunub saxlanılan, tarixi keçmişimizi özündə əks etdirən eksponatlar və digər qədim zəngin dövlətçilik ənənələrinə malik mədəniyyət nümunələri haqda məlumat verildi.
Məktəbin akt zalında davam edən tədbirdə Azərbaycan Xalq Cümhuriyyətinin yaranması haqqında ətraflı məlumat verildi.
Vurğulandı ki, Azərbaycan xalqı keçmişinin müəyyən dövrlərində tarixin hökmü ilə böyük imperiyalar tərkibinə qatılmaq məcburiyyətində qalıb. Azərbaycan Xalq Cümhuriyyəti məhz dünyanın siyasi nizamının yenidən qurulduğu bir vaxtda, XIX əsrin axırları və XX əsrin əvvəllərində Azərbaycanın yaşadığı parlaq mədəni yüksəliş mərhələsinin məntiqi yekunu kimi meydana çıxıb.
Tədbirdə Novxanı kənd 1 nömrəli tam orta məktəbin direktoru Taliyə Mirzəyeva çıxış edərək, Cümhuriyyətinin yaranmasının 100 illiyi münasibəti ilə hər kəsi təbrik etdi.
Qeyd olundu ki, Abbasqulu ağa Bakıxanov və Mirzə Fətəli Axundzadə ilə başlayan bu yolu yeni tarixi mərhələdə Həsən bəy Zərdabi, Cəlil Məmmədquluzadə, Mirzə Ələkbər Sabir, Əli bəy Hüseynzadə və digər görkəmli şəxsiyyətlər davam etdirərək milli məfkurənin təşəkkülü və inkişafına mühüm təsir göstərirdilər. 1918-ci il may ayının 28-də Məmməd Əmin Rəsulzadə Tərəfindən Azərbaycanın müstəqilliyini bəyan edən İstiqlal bəyannaməsi qəbul edildi. Yeni qurulan Azərbaycan Xalq Cümhuriyyəti öz üzərinə götürdüyü çətin tarixi vəzifəni imkanlarının ən son həddində çalışaraq şərəflə yerinə yetirdi. Azərbaycanın ilk Parlamenti və Hökuməti, dövlət aparatı təşkil edildi, ölkənin sərhədləri müəyyənləşdirildi, bayrağı, himni və gerbi yaradıldı, ana dili dövlət dili elan edildi, dövlət quruculuğu sahəsində ciddi tədbirlər həyata keçirildi. Ölkənin ərazi bütövlüyü və milli təhlükəsizliyi təmin edildi, qısa müddətdə yüksək döyüş qabiliyyətli hərbi hissələr yaradıldı, milli tələblərə və demokratik prinsiplərə uyğun dövlət orqanları quruldu, maarifin və mədəniyyətin inkişafına xüsusi diqqət yetirildi, Azərbaycanın ilk universiteti təsis olundu, təhsil milliləşdirildi, xalqın sonrakı illərdə mədəni yüksəlişi üçün zəmin hazırlayan, ictimai fikir tarixi baxımından müstəsna əhəmiyyətli işlər görüldü.
Daha sonra Nəğməkar şair Vüqar Əhməd və digər ziyalılar çıxış etdilər. Natiqlər qeyd etdilər ki, Azərbaycan Xalq Cümhuriyyəti daim sülhsevər siyasət apararaq bütün dövlətlərlə qarşılıqlı əməkdaşlıq əlaqələri yaratmağa və bir-birinin hüquqlarına hörmət prinsipləri əsasında münasibətlər qurmağa cəhd göstərirdi. Dünya birliyi tərəfindən tanınmış Xalq Cümhuriyyətinin fəaliyyəti sayəsində Azərbaycanın beynəlxalq hüququn subyekti olması 1920-ci ilin aprel ayındakı bolşevik işğalından sonra Azərbaycanın bir dövlət kimi dünyanın siyasi xəritəsindən silinməsinin qarşısını aldı.Azərbaycan xalqı ötən dövr ərzində milli dövlətçilik atributlarının bir çoxunu qoruyub saxlaya bildi. Ümummilli lider Heydər Əliyevin respublikada uğurla gerçəkləşdirdiyi siyasət xalqımızın tarixi-mədəni yaddaşını özünə qaytararaq milli mənlik şüurunu inkişaf etdirdi, azərbaycançılıq məfkurəsi işığında müstəqillik arzularının güclənməsi və yaxın gələcəkdə yenidən həqiqətə çevrilməsinə zəmin yaratdı.1991-ci ildə müstəqilliyinin bərpasına nail olarkən müasir Azərbaycan Respublikası özünün qədim dövlətçilik ənənələrinə sadiq qaldığını göstərdi, Xalq Cümhuriyyətinin siyasi və mənəvi varisi olmaqla onun üçrəngli bayrağını, gerbini, himnini qəbul etdi. Xalqımız Cümhuriyyətin istiqlalını dünyaya yaydığı 28 May gününü həmin vaxtdan Respublika Günü olaraq təntənə ilə qeyd edir.
Tədbir şagirdlərin ifasında bir birindən maraqlı musiqi nömrələri ilə davam etdirilidi.
