Ermənistan silahlı birləşmələri Ağdamın Çəmənli kəndini atəşə tutub. Hadisə ötən gün axşam saatlarında baş verib.Düşmən kənddə suvarma idarəsinin əməkdaşlarının olduğu avtomobili hədəf alıb. Mülki şəxslər arasında xəsarət alan olmasa da, avtomobilə ciddi ziyan dəyib.
Müdafiə Nazirliyindən bildirilib ki, bu, Ermənistan tərəfindən mülki əhalinin hüquqlarının kobud şəkildə pozulmasına yönəlmiş məqsədyönlü təxribatıdır. Qeyd edilib ki, cəbhə xəttində vəziyyət bölmələrimizin tam nəzarəti altındadır.
Ağdam rayon Mexaniki Suvarma İdarəsinin rəisi Hafiz Əzimzadə bildirib ki, belə hadisələr rayonun cəbhə xəttinə yaxın ərazilərində tez-tez təkrarlanır.
“5 əməkdaşımız dünən axşam saatlarında İdarənin balansında olan subartezian quyusunun təmiri ilə məşğul olurdular. Cəbhə xəttinə yaxın ərazi olduğu üçün gündüz orada işləmək çətindir. Axşam saatlarında, hardasa 7-9 radələrində həmin ərazilərdə iş aparılır. Dünən də işçilərimiz vəzifələrini yerinə yetirərkən atəş açılıb. Şükür ki, işçilərdən xəsarət alan olmayıb. Amma subartezian quyusunda təmir aparan “KaMaz” markalı aqreqat 15 yerindən böyük snyaper güllələri ilə dəlmə-deşik edilib. Gecə işçilərimiz sürünüb çıxıb, amma maşını çıxarda bilmədik. Bu gün səhər tezdən maşını çıxardıb, qaraja gətirmişik. Təmirdən sonra işimizi yenidən davam etdirəcəyik”.