Tiflisdə Azərbaycan Respublikasının Gürcüstandakı səfirliyinin təşkilatçılığı ilə Azərbaycan Silahlı Qüvvələrinin 100 illik yubileyi münasibətilə rəsmi qəbul keçirilib.
Qəbulda Gürcüstanın Müdafiyə naziri Levan İzoriya, ARDNŞ-in prezidenti Rövnəq Abdullayev, Azərbaycanın Gürcüstandakı fövqəladə və səlahiyyətli səfiri Dursun Həsənov, Gürcüstan Silahlı Qüvvələrinin Baş Qərargah rəisi Vladimir Çaçibaya, müdafiə nazirinin müavini Lela Çikovani, Gürcüstan hökumət və parlamentinin üzvləri, Gürcüstanda akreditə olunmuş diplomatik korpusların nümayəndələri, eləcə də “Qarabağ qaziləri” ambutant futbol komandasının təşkilat komitəsinin sədri Rövşən Quliyev, komandanın üzvləri və qazilər iştirak ediblər.
Tədbirdə Azərbaycanın Gürcüstandakı hərbi attaşesi, polkovnik-leytenant Fuad İbrahimov Azərbaycan ordusunun yaranma tarixi barədə iştirakçılara geniş məlumat verib. O, BMT-nin Dağlıq Qarabağ münaqişəsi ilə bağlı qətnamələrini yerinə yetirmədiyini də vurğulayaraq, hərbi sahədə Azərbaycan və Gürcüstan dövlətləri arasındakı uğurlu əməkdaşlıqdan danışıb. Sonra çıxış edən Gürcüstanın müdafiə naziri Levan İzoriya Azərbaycan ordusunun 100 illiyi münasibətilə Azərbaycan xalqı və rəhbərliyini təbrik edib. Nazir iki ölkə arasında hərbi əməkdaşlıq sahəsindəki münasibətlərin ilbəil daha da inkişaf etdiyini vurğulayıb.
Toplantıda ehtiyatda olan polkovnik-leytenant Elmar Hüseynov ARDNŞ-in prezidenti Rövnəq Abdullayeva Azərbaycan Respublikası Şəhid, Əlil və Veteranlar birliyinin təsisçisi, Qarabağ qazisi Rövşən Quliyevin təşəbbüsü ilə yaradılmış “Qarabağ qaziləri” ambutant futbol komandası barədə məlumat verib. E. Hüseynov qeyd edib ki, may ayının 10-da Abşeron Olimpiya İdman Kompleksində Ulu öndər Heydər Əliyevin anadan olmasının 95 illik yubiliyenə həsr olunan “Qarabağ qaziləri” ambutant futbol komandası ilə Gürcüstanın Avropa çempionu olmuş veteranlardan ibarət ambutant “Tibilisi” komandası arasında beynəlxalq yoldaşlıq paraolimpiya yarışı keçirilib. Görüş 3:2 hesabı ilə komandamızın xeyrinə yekunlaşıb.
Bayram tədbirində Azərbaycanın Gürcüstandakı fövqəladə və səlahiyyətli səfiri Dursun Həsənovda “Qarabağ qaziləri” ambutant futbol komandasının uğurları ilə maraqlanıb, komandanın üzvlərinə uğurlar arzulayıb .
Tədbir konsert proqramı ilə davam etdirilib.
