Abşeron Rayon Prokurorluğunda baş tutan toplantıda rayon hüquq mühafizə orqanlarının əməkdaşları ilə yanaşı, Abşeron RİH-in rəsmiləri və veteran prokurorluq işçiləri iştirak ediblər.
İlk növbədə, prokurorluq orqanlarının bütün əməkdaşlarını, təqaüddə olan veteranları Azərbaycan Prokurorluğunun 100 illik yubileyi və qarşıdan gələn peşə bayramı münasibətilə təbrik edən Abşeron rayon prokurorunun müavini Nail Əliyev bildirib ki, bu gün öz Azərbaycan Milli Prokurorluğunun yaradılmasının 100-cü ildönümünü qeyd edən prokurorluq orqanları çətin və mürəkkəb, eyni zamanda, şərəfli bir inkişaf yolu keçərək formalaşıb, hansı şəraitdə fəaliyyət göstərməsindən asılı olmayaraq son nəticədə millətinə və dövlətçilik ideyalarına sədaqətlə qulluq edib, qanunçuluğun möhkəmləndirilməsi və cinayətkarlığa qarşı mübarizə işində müstəsna xidmətlər göstərib. N.Əliyev qeyd edib ki, prokurorluq orqanlarının müstəqil dövlətimizə uyğun formalaşmasında xalqımızın Ümummilli lideri, ulu öndər Heydər Əliyevin müstəsna rolu olub.Prezident İlham Əliyev də prokurorluq işçilərinə hər zaman diqqət və qayğıkeşliklə yanaşıb. Bunun nəticəsidir ki, prokurorluq əməkdaşlarının əmək haqları xeyli artırılıb, şəxsi heyətin məişət şəraiti əsaslı şəkildə yaxşılaşdırılıb.
"Azərbaycan Prokurorluğunun yaranması və inkişaf tarixi" mövzusunda geniş məruzə ilə çıxış edən rayon prokurorluğunun əməkdaşı Günay Süleymanova çıxışında vurğulayıb ki, bu il 100 illiyini qeyd edəcək Azərbaycan prokurorluq orqanlarının yaranma tarixi Azərbaycan Demokratik Respublikası Nazirlər Şurasının 1 oktyabr 1918-ci il tarixli Qərarı ilə Bakı Dairə Məhkəməsinin tərkibində prokurorluq qurumunun təsis edilməsindən və məhkəmə orqanları sistemində fəaliyyətə başlamasından hesablanır. Ulu öndər Heydər Əliyev prokurorluğun fəaliyyətini daim yüksək qiymətləndirərək hər il oktyabr ayının 1-nin Azərbaycanda prokurorluq işçilərinin peşə bayramı günü kimi qeyd edilməsinə dair 17 iyul 1998-ci il tarixli sərəncam imzalamaqla bu əlamətdar tarixi əbədiləşdirmişdir. Onun “Respublikamızda prokurorluq müstəqil Azərbaycanın dövlət quruluşu sistemində öz yerini tutubdur və ölkəmizin müstəqilliyinə ləyaqətlə xidmət edir” kəlamı həmişə ruh yüksəkliyimizin mənbəyi olmuşdur.
Sonra prokurorluğun veteran əməkdaşlarından Munis Abuzərli, Hafiz Məmmədov və Səyyaf Qubadov çıxış edərək prokurorluq orqanlarının fəaliyyətinin təkmilləşdirilməsi istiqamətində görülən işlərdən, əldə edilən uğurlardan danışıblar.
Şamo Əliyev