Cəbrayıl rayonunun işğaldan azad edilmiş Cocuq Mərcanlı kəndinin sakinlərinə "Aqrolizinq” Açıq Səhmdar Cəmiyyəti tərəfindən ödənişsiz olaraq ammonium nitrat və ammofost gübrələri verilib.
Bu münasibətlə keçirilən tədbirdə “Aqrolizinq” ASC-nin və Füzuli Dövlət Aqrar İnkişaf Mərkəzinin nümayəndələri, Cocuq Mərcanlı kənd sakinləri iştirak edib.
“Aqrolizinq” ASC-nin idarə heyətinin sədr müavini Ziya Vəliyev çıxış edərək, Cocuq Mərcanlı kəndinin inkişafının daim diqqət mərkəzində saxlanıldığını, kənd sakinlərinin məşğulluğunun təmin edilməsi və sosial rifahın yaxşılaşdırılması istiqamətində müxtəlif layihələrin həyata keçirildiyini bildirib. Diqqətə çatdırıb ki, qəsəbə sakinlərinə mineral gübrələrin verilməsində əsas məqsəd gübrə əldə etmək üçün vətəndaşların sərf etdikləri zaman, məsafə itkisinin və əlavə məsrəflərin qarşının alınması və yüksək məhsuldarlığa nail olmaqdır.
Sonra qəsəbə sakinlərinə ödənişsiz olaraq 24 ton ammonium nitrat ve 16 ton ammofos gübrələri verilib.
