"Yaşıl Patrul" Ekoloji İctimai Nəzarətin yaradılması və qərargahlarının təşkili” ümumrespublika marafonu layihəsi çərçivəsində növbəti maarifləndirici tədbir Abşeron rayonunda keçirilib. Azərbaycan Respublikasinin Prezidenti yaninda Qeyri-Hökumət Təşkilatlarına Dövlət Dəstəyi Şurasının 2019-cu il 4-cü Grant Müsabiqəsinin qalibi olmuş layihə "Alyans" Canlı Aləmin Mühafizəsi İctimai Birliyi tərəfindən həyata keçirilir.
Abşeron RİH-nin, mədəniyyət, təhsil, səhiyyə işçilərinin və ictimaiyyət nümayəndələrinin iştirak etdiyi tədbirdə "Alyans" Canlı Aləmin Mühafizəsi İctimai Birliyinin sədri Mənsurə Rəsulzadə çıxış edərək, layihə haqqında məlumat verib, heyvanlarla rəftar, onlara sivil nəzarət sahəsində müasir dünya təcrübəsindən, heyvanlara münasibətdə rəhmsiz davranmanın cəmiyyətə əks təsiri və bu halları aradan qaldırmaq üçün könüllü ekoloji nəzarətin vacibliyindən danışıb.
Abşeron rayon icra hakimiyyəti başçısının müavini Fuad Cəbrayılov ətraf mühitin qorunması sahəsində həyata keçirilən işlərdən söz açıb, bu istiqamətdə maarifləndirici tədbirlərin böyük əhəmiyyət kəsb etdiyini vurğulayıb.
Tədbirdə "Bağışlanılmaz səhv" qısametrajlı filmi və "Heyvanlar bizə nə demək istəyir" adlı sosial sənədli filmi nümayiş olunub. Bədii hissədə ekoloji mövzuda mahnılar ifa edilib.
Toplantıda iştirakçılara flayer və bukletlər paylanıb, ekoloji sorğu keçirilib. Sonra Abşeron rayonu üzrə “Yaşıl Patrul” nümayəndəlikləri müəyyənləşdirilib, ekoloji və bioaləmlə bağlı problemlərə uyğun olaraq fəaliyyət planı işlənilib.
