Azərbaycan xalqının azadlıq və müstəqillik uğrunda mücadiləsi tarixində şanlı səhifələr çox olmuşdur. Xalqımızın igid və qəhrəman oğulları bu yolda canlarından keçmiş, həyatlarını qurban vermişlər. Tariximizin belə səhifələrindən biri də 2016-ci ilin aprel hadisələridir.Bəli növbəti böyük qalibiyyətimizdən 2016 -cı ilin Aprel ayında Dağlıq Qarabağ uğrunda gedən döyüşlərdən 4 il ötdü. Lakin illərin ötüb keçməsinə baxmayaraq aprel döyüşlərində qəhrəmancasına şəhid olan soydaşlarımızın xatirəsi bizim qəlbimizdə bu gün kimi, dünənki kimi daim yaşayacaq. Şəhid olan oğullarımız sırasında 2016-ci ilin aprel ayında Lələtəpə yüksəkliyi və ətraf ərazilərin ermənistan silahlı qüvvələrinin işğalından azad edilməsi uğrunda döyüşlərdə Abşeron rayonundan Şəhid olan Qobu qəsəbə sakini Əli İntiqam oğlu Heydərovda var.
50 saylı Abşeron-Qobustan seçki dairəsi üzrə millət vəkili Şahin Seyidzadə şəhidin doğulub boya-başa çatdığı Qobu qəsbəsində şəhidin ailəsilə görüşüb.
Millət vəkili şəhidin ailəsinə başsağlığı verib və aprel döyüşləri zamanı hərbçilərimizin döyüş meydanında göstərdiyi şücaətdən danışıb.
Bildirib ki, dördgünlük savaşda düşmən ordumuzun qüdrəti qarşısında vahiməyə düşərək bir daha əmin oldu ki, Azərbaycanın güclü ordusu var və Azərbaycan əsgəri qələbə qazanmaq əzmindədir.
Şəhidin atası İntiqam Heydərov şəhid ailələrinin dövlət tərəfindən diqqət və qayğı ilə əhatə olunduğundan danışaraq, şəhid ailələrinin hər zaman Ali Baş Komandan, Prezident İlham Əliyevin arxasında olduğunu bəyan edib.
Daha sonra Ş.Seyidzadə Qobu qəsəbəsindəki Şəhidlər kompleksi ilə tanış olub. Əvvəlcə kompleksin önünə əklil qoyulub, Azərbaycanın ərazi bütövlüyü və suverenliyi uğrunda şəhid olanların xatirəsi bir dəqiqəlik sükutla yad edilib. Sonra kənd qəbiristanlığında şəhidin məzarı ziyarət edilib, önünə tər-çiçək dəstələri qoyulub. Şəhidin ruhuna dualar oxunulub.