Abşeron Rayon Mərkəzi Xəstəxanasının dəstəyi və Mehdiabad qəsəbə həkim ambulatoriyasının təşkilatçılığı ilə Mehdiabad qəsəbə 4 saylı tam orta məktəbdə koronavirusla bağlı maarifləndirici tədbir keçirilib.İlk önçə Ümumdünya Səhiyyə Təşkilatı tərəfindən koronavirus haqqında hazırlanan slayd təqdim edilib. Toplantını giriş sözü ilə Məktəb direktoru prof. Elnurə Cavadzadə açaraq qonaqları təqdim edib.
Məktəbin müəllimlərinin və yuxarı sinif şagirdlərinin iştirak etdiyi marifləndirici tədbirdə çıxış edən Mehdiabad həkim ambulatoriyasının baş həkimi Qənitə İsmayılova ölkə başçısının tapşırığına əsasən koronavirus və onunla mübarizə metodları haqqında əhali arasında maarifləndirmə işlərinin aparıldığını, respublikada, eləcə də sərhəd-keçid məntəqələrində profilaktik tədbirlərin gücləndirildiyini söyləyib.
Sonra Rayon Mərkəzi Xəstəxanasının həkimi, infeksionist Əminə İsmixanova çıxışında koronovirusun əlamətləri və qorunma üsullarından danışıb. Bildirib ki, ilk dəfə 1960-cı ildə heyvanlarda aşkarlanan xəstəlik növbəti illərdə insanlara da yoluxub və 2003-cü ildə Şiddətli Kəskin Respirator Sindromu (SARS), 2012-ci ildə isə Orta Şərq Respirator Sindromu (MARS) şəklində tələfatlara səbəb olub. O, koronavirusun Çinin Vuhan əyalətində üzə çıxan yeni növünün Ümumdünya Səhiyyə Təşkilatı tərəfindən 2019-nCoV adlandırıldığını, zəif immunitet sistemi olan insanlara tez yoluxduğunu söyləyib. Baş ağrısı, hərarət, öskürmək, asqırmaq, iştahsızlıq, mədə-bağırsaq sisteminin pozulmasının xəstəliyin ilk simptomlarından olduğunu deyən Ə.İsmixanova belə hallarda dərhal həkimə müraciət edilməsinin vacibliyini bildirib. İnfeksionist virusun 60 dərəcədə, eləcə də dezinfeksiya zamanı məhv olduğunu deyib, xəstəliyə yoluxmamaq üçün profilaktik tədbirlərin (xəstə insanlarla təmas zamanı və digər hallarda əlləri yumaq, spirtlə təmizləmək, ət məhsullarını tam bişirmək, immuniteti gücləndirmək, C vitamini qəbul etmək) mütəmadi aparılmasının önəminə toxunub.
Sonda tədbir iştirakçılarını maraqlandıran çoxsayılı suallar həkimlər tərəfindən cavablandırlıb.
