Silahlı Qüvvələrin Baş Qərargah rəisinin müavini - Döyüş Hazırlığı və Hərbi Təhsil Baş İdarəsinin rəisi, general-leytenant Nizam Osmanovun rəhbərlik etdiyi nümayəndə heyəti martın 1-də Moskvada keçiriləcək “Beynəlxalq Ordu Oyunları - 2018” yarışlarının planlaşdırma konfransında iştirak edəcək.
Müdafiə Nazirliyinin mətbuat xidmətindən bildiriblər ki, tədbir zamanı yarışların şərtləri və qaydaları müzakirə olunacaq, eləcə də müsabiqənin keçirilmə yerlərinə baxış keçiriləcək.
Hərbçilərin beynəlxalq yarışlarında Azərbaycan Ordusunun nümayəndələrinin “Dəniz kuboku”, “Tank biatlonu”, “Artilleriya atəşinin ustaları”, “Snayper həddi” və “Səhra mətbəxi” müsabiqələrində iştirakı, o cümlədən “Dərinlik” və “Qoşun kəşfiyyatının əlaçıları” yarışlarına müşahidəçi qismində qatılmaları planlaşdırılır.
Azərbaycan, Belarus, Qazaxıstan, İran, Çin və Rusiya ərazisində təşkil olunacaq 27 beynəlxalq müsabiqədən ibarət “Beynəlxalq Ordu Oyunları - 2018” yarışlarının iyulun 28-dən avqustun 11-dək keçirilməsi nəzərdə tutulub.
