Aprelin 11-də Azərbaycanın Los Ancelesdəki baş konsulluğunda Azərbaycan Prezidentinin seçkiləri keçirilib.
Səsvermə baş konsulluqda yaradılmış 17 saylı Yasamal 3-cü seçki dairəsinin 54 saylı seçki məntəqəsində təşkil edilib. Bu məntəqə Azərbaycandan ən uzaq məsafədə yerləşən və seçkilərin ən axırıncı yekunlaşdığı seçki məntəqəsi olub.
Los Anceles ilə Bakı arasında 11 saat zaman fərqinin olduğunu nəzərə alaraq, seçkilər burada Bakı vaxtı ilə aprelin 12-də səhər saat 6-da yekunlaşıb. Seçkilərdə Kaliforniyada və ABŞ-ın digər qərb ştatlarında daimi və müvəqqəti yaşayan Azərbaycan vətəndaşları, baş konsulluğun əməkdaşları və onların səsvermə hüququ olan ailə üzvləri iştirak edib. Bundan başqa, Argentina və Braziliyadan da Azərbaycan vətəndaşları səs vermək üçün Los Ancelesə gəlib.
Səsvermə Azərbaycan qanunvericiliyinin bütün tələblərinə uyğun olaraq təşkil edilib. Məntəqədə vətəndaşların rahat və demokratik şəkildə səs verməsi üçün lazımi şərait yaradılıb. Məntəqə seçki komissiyasına hər hansı qanun pozuntusu barədə şikayət və irad daxil olmayıb.
