"Azərbaycan və Ermənistan prezidentlərinin Vyana görüşü ümidvericidir. Lakin hər şey münaqişə tərəflərindən asılıdır".
Bu bəyanatla Moskvada keçirdiyi mətbuat konfransında Rusiyanın xarici işlər naziri Sergey Lavrov çıxış edib. O bildirib ki, Rusiya digər həmsədr ölkələrlə birlikdə Dağlıq Qarabağ münaqişəsinin həlli üzrə dialoqa kömək etmək istəyir:
"Həmsədrlərin müəyyən müddəalar irəli sürür, tərəflər də bunları rədd etmir, lakin razılığa gəlmək üçün əlavə məqamlar tələb olunur. Biz danışıqlar prossesinə kömək etməyə hazırıq, ancaq tərəflərin əvəzindən bu işi görə bilmərik".
Sergey Lavrov separatçı Dağlıq Qarabağ rejiminin Ermənistanın Rusiyadakı səfirliyində nümayəndəliyinin fəaliyyət göstərməsi ilə bağlı xəbərlərə də münasibət bildirib. O, bundan xəbərsiz olduğunu bildirib. Sergey Lavrov səfirlikləri Vyana Konvensiyasına riayət etməyə də çağırıb. O deyib ki, Vyana Konvensiyasına zidd olaraq, səfirliklərin ərazisi az qala restoranlara da icarəyə verilir.