Dövlət başçısının Sərəncamı ilə "Formula - 1" Azərbaycan «Qran-Pri»sinin təşkili və keçirilməsi ilə bağlı ölkəmizə gələcək əcnəbilər və vətəndaşlığı olmayan şəxslər üçün viza prosedurları sadələşdirilib
Azərbaycanın idman tarixində yeni bir səhifə olan elit yarışmalar sırasında yer alan "Formula-1" yarım əsrdən artıq tarixində yaddaqalan zamanını yaşayır. 2016-cı ildən başlayararaq, paytaxtımızda keçirilən "Formula-1" yarışlarının yüksək səviyyədə keçirilməsi üçün ölkəmizdə hər cür şərait yaradılıb. Müasir dünyanın idman ölkəsi kimi tanıdığı Azərbaycanda dövlət başçısının ölkə həyatının bütün sahələrində olduğu kimi, idmanın inkişafına yönəlmiş qərarların qəbulu, tədbirlərin reallaşması idman sahəsində ölkəmizin yüksək beynəlxalq nüfuz qazanmasına səbəb olub. Azərbaycanda keçirilən dünya və Avropa çempionatları sübut edir ki, həqiqətən də, ölkəmizdə idman sürətlə inkişaf edir. Ölkəmizin, ardıcıl olaraq, beynəlxalq yarışlarda iştirakı və uğurlar qazanması beynəlxalq aləmin Azərbaycandakı idman hərəkatına olan diqqətini atırıb. Təbii ki, Azərbaycanda idman infrastrukturunun mövcudluğu beynəlxalq yarış keçirilməsinə imkan yaradıb. Dünyanın idman arenasında özünə layiqli yer tutan Azərbaycanın beynəlxalq yarışlara ev sahibliyi etməsində, iqtisadi nailiyyətlərimiz də əsas amillərdəndir. Artıq paytaxtımızda növbəti "Formula-1" Azərbaycan «Qran-Pri»sinin start götürməsinə az qalıb. Aprelin 26-28-də keçiriləcək "Formula-1" Azərbaycan «Qran-Pri»sini keçirmək, bütün iştirakçıları və qonaqları hər zaman olduğu kimi, növbəti dəfə də yüksək səviyyədə qarşılamaq üçün lazımi tədbirlər görülüb. Təbii ki, Bakının ev sahibliyi edəcəyi böyük idman yarışı maraqlı və əyləncəli olacaq. Ölkəmizə gələcək "Formula-1" iştirakçıları və qonaqlar, bir daha Azərbaycanın dünyaya nümunə olan çoxəsrlik tolerant, mehriban birgəyaşama mədəniyyəti, multikultural mühiti ilə yaxından tanış ola biləcəklər. Hər il olduğu kimi bu il də minlərlə turistin ölkəmizə yarışları izləmək üçün gələcəyi şübhəsizdir. Martın 5-də Azərbaycan Prezidenti İlham Əliyevin "Formula - 1" Azərbaycan «Qran-Pri»sinin təşkili və keçirilməsi ilə bağlı Azərbaycan Respublikasına gələcək əcnəbilər və vətəndaşlığı olmayan şəxslər üçün viza prosedurlarının sadələşdirilməsinə dair Sərəncam imzalayıb. Sərəncama əsasən, Azərbaycanda keçiriləcək "Formula - 1" «Qran-Pri»si ilə əlaqədar ölkəmizə gələn, "Formula - 1" yarışlarının beynəlxalq təşkilatçıları olan "Formula One Management Limited" şirkətinin və Beynəlxalq Avtomobil Federasiyasının müvafiq qaydalarına uyğun olaraq "Bakı Şəhər Halqası" Əməliyyat Şirkətində akkreditasiyadan keçməni təsdiq edən akkreditasiya kartını, habelə, yarışa bilet və ya biletin əldə olunmasını təsdiqləyən sənədi təqdim edən əcnəbilər və vətəndaşlığı olmayan şəxslər martın 15-dən mayın 15-dək Azərbaycan Respublikasının beynəlxalq hava limanlarında viza ala bilərlər.
Bundan başqa, Xarici İşlər Nazirliyinə «Qran-Pri» ilə əlaqədar Azərbaycana gələn şəxslər üçün viza prosedurlarının sadələşdirilməsi, habelə, Azərbaycan Prezidentinin 2016-cı il 1 iyun tarixli Fərmanına əsasən, təsdiq edilmiş ölkələrin siyahısı üzrə əcnəbilərin və vətəndaşlığı olmayan şəxslərin "ASAN Viza" sistemi vasitəsilə elektron viza almaq imkanı barədə "Formula One Management Limited" şirkətinə, Beynəlxalq Avtomobil Federasiyasına və xarici ölkələrin müvafiq orqanlarına məlumat vermək tapşırılıb.
Eləcə də, «Qran-Pri» ilə əlaqədar Azərbaycan Respublikasına gələn şəxslər üçün viza prosedurlarının sadələşdirilməsi, habelə, əcnəbilərin və vətəndaşlığı olmayan şəxslərin "ASAN Viza" sistemi vasitəsilə elektron viza almaq imkanı barədə məlumatın nazirliyin, eləcə də, Azərbaycan Respublikasının xarici ölkələrdəki səfirliklərinin və konsulluqlarının internet informasiya ehtiyatlarında yerləşdirilməsini təmin etmək barədə tapşırıq verilib.
Sərəncamda, həmçinin, Dövlət Miqrasiya Xidmətinə Azərbaycan Respublikasına uçuşlar həyata keçirən aviasiya şirkətlərinə «Qran-Pri» ilə əlaqədar ölkəmizə gələn şəxslər üçün viza prosedurlarının sadələşdirilməsi barədə məlumat vermək tapşırılıb.
Təbii ki, bu il "Formula - 1" «Qran-Pri»si ilə əlaqədar Azərbaycana gələn şəxslərin sayı daha çox olacaq. Belə ki, bilet satışları ötən illə müqayisədə daha çoxdur. Keçən ilin eyni dövrü ilə müqayisədə bilet satışında daha böyük artım müşahidə olunur. İndiyədək 46 ölkədən bilet alınıb və bu rəqəm hər ötən gün artaraq, daha geniş coğrafiyanı əhatə edir. Hazırda Rusiya və Böyük Britaniyadan sonra Azərbaycan «Qran-Pri»sinə ən çox maraq göstərən ölkələr Gürcüstan, Avstriya, Hollandiya, Polşa, Birləşmiş Ərəb Əmirlikləri və Finlandiyadır.
Görülən işlər, həyata keçirilən tədbirlər bu fikri təsdiqləyir ki, "Formula - 1"-in Bakıda təşkili dünya avtoidman ictimaiyyətinin Azərbaycan «Qran-Pri»sinə marağını daha da artırır.
