Bu gün Xırdalan şəhər 1 nömrəli tam orta məktəbdə “İrəli, Azərbaycan əsgəri” mövzusunda konsert proqramı kecirilib. Tədbirdə Azərbaycanın tanınmış hərbi diktoru, hərbi vətənpərvərlik mahnılarının ifaçısı, “Vətənpərvərliyin Təbliğinə Dəstək” İctimai Birliyinin sədri Şəmistan Əlizamanlı, Qarabağa yollanan birinci batalyonun döyüşçüsü, ehtiyyatda olan zabit Kamil Şirinov, 1 saylı məktəbin müəllim və şagird kollektivi, eləcə də rayon ziyalıları iştirak ediblər.
Vətənimizin ərazi bütövlüyü, eləcə də düşmən taptağı altında olan torpaqlarımızın qaytarılması uğrunda canlarından keçən şəhidlərimizin xatirəsini bir dəqiqəlik sükutla yad edildikdən sonra məktəbin direktoru Kəmalə Yusifova bu cür tədbirlərin əhəmiyyətini, şagirdlərin mənəvi-psixoloji inkşafına müsbət təsir göstərdiyini qeyd edib.
Daha sonra Azərbaycan himni səslənib, Koroğlu uvertürası sədaları altında Azərbaycan respublikasının dövlət bayrağı şagirdlər tərəfindən səhnəyə gətirilərək “Bayraq” şeiri oxunub. Öyrəncilər hərbi-vətənpərvərlik mövzusunda müxtəlif səhnəciklər nümayiş etdirib, şeirlər oxuyub, mahnilar səsləndiriblər.
Xüsusilə Hüseynbala Mirələmovun “Güllələnmiş heykəllərin fəryadı” ədəbi əsərinin əsasında yazılmış “Ruhların fəryadı” adlı səhnəcik, “Sarı gəlin” mahnısı, eləcə də Şəmistan Əlizamanlının şagirdlərlə birgə məhşur “Cənab Leytinant” mahnısını ifa edilməsi tamaşaçılar tərəfindən alqışlarla qarşılanıb.
Səhnəyə dəvət edilən Şəmistan Əlizamanlı uşaqların hazırlığını, konsertin təşkilini və kompozisiyaların efektliyini yüksək qiymətləndirib.
Konsert proqramı tanınmış ifaçının yeni mahnıları ilə sona çatıb.
