Mehdiabad qəsəbə 4 nömrəli tam orta məktəbdə 20 Yanvar Ümumxalq Hüzn Gününə həsr olunmuş “Tarixin Qanlı Səhifəsi” adlı tədbir keçirilib.
Tədbirdə BDU-nun kafedra müdiri prof. Anar İsgəndərli, Amea-nın Tarix İnstitutunun elmi işçisi, tədqiqatçı alim Vaqif Hacıyev, Qafqaz Universitetini dosenti Bilal Dədəyev, Təhsil Şöbəsinin əməkdaşları, Mehdiabad qəsəbə İcra Hakimiyyətinin nümayəndəsi, şəhid ailələri, məktəbin pedaqoji kollektivi və şagirdlər iştirak ediblər.
Tədbir Dövlət himninin səslənməsi ilə açıq elan edilib. Daha sonra vətən uğrunda şəhid olanların ruhu bir dəqiqəlik sükutla anılıb.
Tədbirin əvvəlində şagirdlər 20 Yanvar hadisələri ilə bağlı şeirlər səsləndirib, səhnəciklər göstəriblər.
Məktəb direktoru prof. Elnurə Cavadzadə bildirib ki, Azərbaycan xalqı həmişə öz tarixi ilə fəxr edib, çünki, onun tarix səhifələri qəhrəmanlıqlarla doludur. Lakin, bu səhifələr qansız-qadasız yazılmamışdır. Qoca tarixin səhifələrinə əbədi həkk olmuş qanlı günlərdən biri də 20 Yanvar faciəsidir. Azərbaycan xalqının yaddaşında müstəqilik zirvəsi kimi həkk olunan bu gün bizi nə qədər incitsə də, bir o qədər ruhlandırır. Çünki, 20 Yanvar bizim milli qeyrət günümüzdür.
Daha sonra qonaqlar çıxış edərək, 27 il öncə Bakı şəhərində və ölkəmizin digər bölgələrində SSRİ hərbi birləşmələri tərəfindən dinc əhaliyə qarşı törədilmiş qırğından söz açıb, qan yaddaşımızın ən mühüm məqamlarından biri olan həmin hadisə ilə xalqımızın demokratiya və suverenlik uğrunda apardığı mübarizəsinin dönməzliyini bütün dünyaya nümayiş etdirdiyini vurğulayıblar.
