Novruz bayramı ilə əlaqədar rayonumuzun məktəb və uşaq bağçalarında bir sıra bayram tədbirləri düzənlənir.
Bayram şənliklərindən biri də Xırdalan şəhər 27 saylı uşaq bağçasında keçirildi.
Biz də bayram şənliyinin necə keçirildiyini görmək üçün adıçəkilən bağçaya yollandıq. Bağçaya daxil olarkən əsl bayram əhval-ruhiyyəsini hiss etdik. Bayram libaslarında olan uşaqlar böyük sevinclə öz çıxışlarını gözləyirdilər.
Bildirək ki, bayram şənliyi Azərbaycan bölməsinin uşaqlarının iştirakı ilə düzənlənmişdi.
Qonaqların və valideynlərin də iştirakı ilə keçirilən şənlikdə balacalar çıxışlarına öncə Novruz mahnısı ilə başladılar. Tədbiri giriş sözü ilə açan bağçanın müdirəsi S. Məmmədova "İlaxır çərşənbə" münasibətilə qonaqları, valideyinlər və bağçanın kolektivini təbrik etdi. Novruz bayramı haqqında məlumat verən bağçanın rəhbəri bu gözəl yaz günlərində xalqımıza əmin amanlıq, sülh, bol ruzi, sağlamlıq və xöşbəxtlik arzuladı.
Daha sonra uşaqlar hazırladıqları bayram şeirlərini sıra ilə qonaqlara söylədilər. Bundan başqa, uşaqlar bir-birindən gözəl rəqslər də nümayiş etdirdilər.
Balaca Bahar qızının rəqsi və şeri isə bayrama daha da gözəllik gətirdi. Bayramın sonuna yaxın isə zala Novruzun simvolları olan Kosa və Keçəl təşrif buyurdular. Onların gəlişi isə uşaqların sevincini daha da artırdı. Kosa və Keçəlin məzəli söhbətləri, uşaqlarla oyunları bayramı daha da maraqlı etdi.
Balaca fidanların hazırladıqları səhnəciklər maraqlı nümayiş edildi. Milli geyimdə olan balacalar rəqs edərək, baharın gəlişinə aid mahnılar oxudular.
Bağçaya bu gözəl “İlaxır çərşənbə günü qonaq gəlmiş Xırdalan şəhər 23 saylı Uşaq bağçasının və Körpələr evinin müdirəsi Aybəniz Sadıxovdan bayram təəssüratlarını öyrəndik. O bizimlə söhbətində uşaqların çıxışlarından razı qaldığını bildirdi: "Bağçada çox istedadlı uşaqlar var. Onlar hər bir şeri, mahnını, rəqsi asanlıqla öyrənə bilirlər. Düzdür, bəzən dəcəllikləri edənlərdə az olmur. Amma buna baxmayaraq, çox bacarıqlıdırlar. Mən bu günkü tədbirdən çox razı qaldım".
Bağçanın müdirəsi Samirə Məmmədova isə bizimlə söhbətində təzə istifadəyə verilmiş bağçada bütün əlamətdar günlərin təşkil olunduğunu bildirdi:
"Biz bağçamızda nəinki Novruz bayramını, bütün bayramları keçirməyə hazırıq” Bundan əvvəl olan əlamətdar hadisələr olan günləri və bayramları da yüksək səviyyədə keçirdik".
Bayramla əlaqədar valideynlərlə də söhbətləşdik. Bahar Əmrahova adlı valideyn uşaqların bayram şənliyindən çox razı qaldığını bildirdi: "Bayram çox yüksək səviyyədə keçirildi. Şənlikdə Novruza xas olan bütün atributlar var idi. Bu isə uşaqların sevincinə səbəb oldu. Belə gözəl bayram təşkil etdiklərinə görə bağçanın müdirinə və tərbiyəçilərə təşəkkürümüzü bildiririk".
Digər valideynlər də bizimlə söhbətlərində bayram şənliyinin düzənlənməsindən çox razı qaldıqlarını söylədilər.
Bizdə öz növbəmizdə Xırdalan şəhər 27 saylı Uşaq bağçası və Körpələr evinin rəhbərliyinə, müəllim və tərbiyəçilərə tədbirin təşkilatçılığına görə öz təşəkkürümüzü bildiririk.