Abşeron rayon Gənclər və İdman idarəsinin təşkilatçılığı və Abşeron rayon İcra Hakimiyyətinin dəstəyi ilə gənclərin hərbi vətənpərvərlik tərbiyəsinin gücləndirilməsində, onların fiziki hazırlıqlarının artırılmasında, ordu sıralarına hazırlanmasında mühüm rol oynayan “Şahin” hərbi-idman oyunu üzrə rayon birinciliyi keçirilib
Yarışın açılış mərasimində rayon Gənclər və İdman İdarəsinin rəisi Əsgər Əmirəliyev çıxış edərək gənc şahinləri salamlamış və “Şahin” hərbi - idman oyununun keçirilməsində məqsədin məktəblilər arasında aparılan hərbi vətənpərvərlik tərbiyəsi işini daha da gücləndirmək, orta məktəb şagirdlərinin hərbi-idman oyunlarına geniş cəlb etməklə onların ordu sıralarında xidmətə hazırlığını inkişaf etdirməkdən ibarət olduğunu diqqətə çatdırıb. Rayonun tam orta məktəblərinin VIII-X sinif şagirdlərindən ibarət 38 komandanın iştirak etdiyi yarış gərgin idman mübarizəsi şəraitində keçib. Yarışın əsasnaməsinə uyğun olaraq sıra hazırlığı mərhələsi keçirilib, daha sonra komandalar estafet mərhələsində mübarizələrini davam etdiriblər.
Yarışın yekun nəticəsinə əsasən Saray qəsəbə 3 saylı tam orta məktəbin komandası I yeri, Mehdiabad qəsəbə 2 saylı tam orta məktəbin komandası II yeri və Qobu qəsəbə 1 saylı tam orta məktəbin komandası III yeri tutublar.
Qalib komandalara Gənclər və İdman idarəsinin diplomları təqdim edilib.
Qeyd edək ki, I yerin qalibi olan Saray qəsəbə 3 saylı tam orta məktəbinin komandası 20 aprel 2017-ci ildə Qusar rayonunda keçiriləcək zona birinciliyində Abşeron rayonunu təmsil edəcək.
Şamo Əliyev
