Tədbirin açılışı ilk olaraq Azərbaycan himninin səsləndirilməsi ilə başlanıb. Daha sonra balaca fidanlar vətənə, müəllimə, ana dilimizə, təbiətə, sülhə həsr edilən şeirlər söyləyiblər. Tədbirdə həmçinin uşaqların iştirakı ilə hazırlanmış rəqslər nümayiş etdirilib. Ümummilli lider Heydər Əliyev, Nizami Gəncəvi, Nəsimi kimi dahilərin vətən, Azərbaycan haqqında fikirləri səsləndirilib. "Anam mehribanım Azərbaycanım”, "Biz məktəbə hazırıq” və s. kimi mahnıların ifası tədbiri daha da maraqlı edib. Tədbirdə çıxış edən valideynlər və müəllimlər bağça və uşaqlar ilə bağlı öz ürək sözlərini söyləyiblər. Bağçanın direktoru Rəhilə Əliyeva çıxış edərək qürur hissi ilə bağçanın qazandığı uğurlardan danışıb.
Abşeron Rayon İcra Hakimiyyəti başçısı Aparatının Yetkinlik yaşına çatmayanların işləri və hüquqlarının müdafiəsi üzrə komissiyanın uşaqlarla iş üzrə məsləhətçi-psixoloqu Seymur Qasımov uşaqları məktəbə getmələri münasibəti ilə təbrik edib, onlara gələcək həyatda müvəffəqiyyətlər və ölkəmiz üçün layiqli övlad olmalarını arzulayıb.
Uşaqların əllərində hərflər yazılmış çəlləkləri fırladaraq "AZƏRBAYCAN" yazısını tamamlamaları tədbirə xüsusi rəng qatıb, hər kəsin könlünü oxşayıb.
Sonda balaca fidanlara fotolarından ibarət albom və hədiyyələr təqdim edilib.
Şamo Əliyev