10.06.2017-ci il tarixində Abşeron Rayon Mədəniyyət Mərkəzində Xırdalan şəhər 24 saylı körpələr evi- uşaq bağçası “Əlvida bağça”- adlı buraxılış bayramı keçirildi.
Tədbirdə Abşeron Rayon İcra Hakimiyyəti başçısının köməkçisi Fuad Xəlilov, Abşeron Rayon İcra Hakimiyyəti başçısı Aparatının Yetkinlik yaşına çatmayanların işləri və hüquqlarının müdafiəsi üzrə komissiyanın uşaqlarla iş üzrə məsləhətçi-psixoloqu Seymur Qasımov, 24 saylı körpələr evi-uşaq bağçasının müdiri Leyla Bayramova və bağçanın kollektivi iştirak ediblər.
Tədbirdə məktəbəhazırlıq qrup uşaqları doğma Azərbaycan dili ilə yanaşı rus dilində də müxtəlif şeirlər söylədilər, mahnılar oxudular, səhnəciklər nümayış etdirdilər. Uşaqların ifa etdikləri rəngarəng rəqs və gimnastik nömrələr alqışlarla qarşılandı.
Sonra uşaq bağçasının müdiri Leyla Bayramova bildirdi ki, uşaqlar buraxılış gününə tərbiyəçilərinin köməyi ilə xüsusi hazırlaşıblar. Bu gün yola saldığımız uşaqlar illər öncə bağçamızın qapısını açanda söz deməyə belə çəkinsələr də, indi onlar sərbəst danışır, rəqs edir, şeir söyləyir, mahnı oxuyur və digər bədii fəaliyyətlə məşğul olurlar. Ayrılıq həmişə kədər doğurur. Amma həm də sevinirik ki, bu gül balalar sabah əllərinə çanta alıb məktəbə gedəcək, pillə-pillə təhsildə irəliləyəcək, gələcəyin layiqli elm, incəsənət adamları olacaq, vətənə xeyir verəcəklər.
Seymur Qasımov dövlətimizin uşaqlara göstərdiyi diqqət və qayğıdan, onların sağlam, gümrah, savadlı, cəmiyyətə yararlı bir vətəndaş kimi yetişməsi üçün yaradılan şəraitdən danışdı.S.Qasımov əlamətdar gün münasibətilə valideynləri təbrik etdi, bağça dünyası ilə vidalaşaraq məktəb illərinə qədəm qoyacaq fidanlara uğurlar arzuladı.
Bayram mərasimində nümunəvi işi ilə fərqlənən bir qrup tərbiyəçiyə Fəxri fərman, uşaqlara isə təşəkkürnamə təqdim olundu.
Məlumat üçün bildirək ki, Xırdalan şəhərində yerləşən 24 saylı körpələr evi- uşaq bağçası 2013-cü ildən fəaliyyət göstərir. Bu illər ərzində yüzlərlə uşaq bu bağçada tərbiyə almışdır. Hazırda burada 6 qrup - kiçik, orta, 2 böyük və 2 məktəbəqədər qrup fəaliyyət göstərir və həmin qruplarda 115 uşaq tərbiyə alır. Bu il 40 uşaq bağçadan məktəbə yola salınacaqdır.
Şamo Əliyev
