Azərbaycan Respublikasının Prezidenti yanında Bilik Fondu ilə “Azərbaycan müəllimi” qəzeti redaksiyasının birgə keçirdikləri “Ən yaxşı yazı” müsabiqəsinə yekun vurulub. Abşeron Rayon Təhsil Şöbəsinin əməkdaşı Səkinə Abbasova müsabiqədə II yerin qalibi olub:
- İlk dəfədir belə bir müsabiqədə iştirak edirəm. Təqdim elədiyim yazı “Şagirdlərin peşə seçimində məktəb müəllim və valideyn üçbucağı” mövzusunda idi. Bir neçə gün əvvəl mənə zəng edərək, müsabiqədə yer tutduğumu söylədilər, ancaq II yerin qalibi olduğumu mükafatlandırma zamanı öyrəndim. Bu mənim üçün gözlənilməz oldu, çox sevincliyəm, heç inanmırdım ki, müsabiqəyə təqdim olunan işlər içərisində mənim yazım II yerə layiq görülər. Belə bir layihənin təşkilinə görə Təhsil Nazirliyinə, “Azərbaycan müəllimi” qəzeti redaksiyasına və Bilik fonduna öz minnətdarlığımı bildirirəm. Ümiq edirəm gələcəkdə bu kimi müsabiqələr daha tez-tez keçirilər.
Məlumat üçün bildirək ki, müsabiqəyə müəllimlərin şəxsi iş təcrübəsinə əsaslanmaqla təhsilin və müasir dərsin aktual problemləri barədə metodik yazılar qəbul olunub. Məqsəd yaradıcı müəllimləri aşkara çıxarmaq, onları axtarışlara həvəsləndirməkdir. Müsabiqədə müəllimlərlə yanaşı, digər təhsil işçiləri iştirak ediblər. Yazıların qəbulu üçün ayrılmış bir ay ərzində təşkilat komitəsinə 82 iş daxil olub. Dəyərləndirmə iki mərhələdə aparılıb. Birinci mərhələdə yazılara fənlər üzrə təcrübəli müəllimlər, pedaqoq-metodist alimlər tərəfindən baxılaraq müvafiq qiymətləndirmə aparılıb. Seçilmiş 28 yazı ikinci mərhələdə münsiflər heyəti tərəfindən qiymətləndirilib.
Şamo Əliyev