Abşeron rayon İcra Hakimiyyətinin və Rayon Mərkəzi Xəstəxanasının birgə təşkilatçılığı, Xırdalan şəhər 17 nömrəli körpələr evi-uşaq bağçasının dəstəyi ilə “Ekoloji mədəniyyət” mövzusunda marifləndirici tədbir keçirilib.
Tədbirdə Rayon Mərkəzi Xəstəxanasının baş həkimi Mehriban Qaralova, Abşeron RİH-in əməkdaşı Seymur Qasımov, səhiyyə işçiləri və bağçanın kollektivi iştirak ediblər.
Bağçanın müəllimi Sevinc Seyfullayeva məlumat verib ki, sağlam həyat tərzinin formalaşmasında insanın sağlamlığına müsbət təsir edən amillərin, xüsusilə, gündəlik iş rejiminin, səmərəli qidalanmanın, idmanla məşğul olmağın, ətrafda olan həmyaşıdları ilə xoş və qarşılıqlı ünsiyyətin böyük təsiri vardır. Qlobal və lokal ekoloji problemlərin səhralaşma və torpaqların deqradasiyası, biomüxtəlifliyin tükənməsi, urbanizasiya, stress kimi ciddi problemlərin artdığı bir dövrdə əsrin xəstəlikləri hesab edilən hemofiliya (talassemiya), narkomaniya, alkoqolizm, ürək damar, xərçəng xəstəlikləri geniş yayılmışdır. Belə bir dövrdə sağlamlıq haqqında biliklərə yiyələnmək və bu biliklərə riayət etmək hər bir mədəni insanın başlıca vəzifələrindən biridir. Sağlam həyat tərzi hər bir yeniyetmənin, gəncin şəxsi seçim yolu və fərdi davranış sistemidir.
Marifləndirici tədbirdə çıxş edən Mehriban Qaralova və Seymur Qasımov qeyd ediblər ki, bağçalarda “Ətraf mühit və insanın sağlamlığı”, “Cəmiyyət və ekologiya”, “Biosfer və insan”, “Əhali və ətraf mühit”, “Ekoloji mədəniyyət”, “Məişət ekologiyası” mövzusunda keçirilən məşğələlər zamanı uşaqlara sağlam həyat tərzinin formalaşmasında müəllimlərin yaradıcı mövqeyi və şəxsi nümunəsi xüsusi rol oynayır.
Vurğulanıb ki, bu məşğələlərdə məşğul olan uşaqlar ekoloji biliklərə yiyələnməklə yanaşı, ekoloji təfəkkürə və mədəniyyətə malik bir şəxsiyyət kimi formalaşırlar. Ətraf mühitin sağlamlığının qayğısına qalan uşaqlar, eyni zamanda özlərinin də fiziki və mənəvi sağlamlığı barədə düşünürlər. Ətraf mühitin sağlamlaşdırılması, ekoloji vəziyyətin yaxşılaşdırılması istiqamətində həyata keçirilən bu cür genişmiqyaslı silsilə tədbirlər rayon ərazisində yerləşən bütün idarə, müəssisə və təşkilatlarda davam etdiriləcək.
Tədbirdə həmçinin bağçanın körpə fidanları tərəfindən həkimlik peşəsinə həsr olunmuş səhnəcik nümayiş olunub.
Sonda bağçanın həyətində 100-dən çox meyvə ağacları əkilərək ətraf mühitin mühafizəsinə töhfə verilib.
Məlumat üçün bildirək ki, aksiyanın keçirilməsində məqsəd ağac əkməklə ekoloji tarazlığın bərpasına, ətraf mühitin qorunmasına kömək etmək, atmosferi oksigenlə zənginləşdirmək, ictimaiyyətin diqqətini yaşıllıqların qorunmasına yönəltməkdir.
Şamo Əliyev
