Xırdalan şəhər 2 nömrəli tam orta məktəbdə 5 ci siniflər arasında tarix fənni üzrə bilik yarışı keçirilib. Bilik yarışında giriş nitqi ilə çıxış edən məktəbin direktoru Ədalət Camalova vurğulayıb ki, tarixini bilməyən xalqın gələcəyi olmaz - deyiblər. Bir xalq kimi bizim də tariximizin kökü çox qədimdir. Hər birimiz tariximizi bilməli, onu gələcək nəslə layiqincə çatdırmalıyıq. Bu şərəfli iş biz müəllimlərin üzərinə daha çox düşür. Çalışırıq ki, dilimizi, tariximizi, maddi-mənəvi dəyərlərimizi şagirdlərə tanıdaq, sevdirək və təhrif etmədən olduğu kimi gələcək nəslə çatdıraq. Yarışın keçirilməsində məqsəd gənclərin intellektual səviyyəsinin yüksəlməsinə şərait yaratmaq, istedadlı gəncləri üzə çıxarmaq, onların milli-mənəvi dəyərlərimiz və tariximiz haqqında daha geniş biliklərə sahib olmalarına kömək göstərməkdir.
Məktəbin akt zalında keçirilən yarışda 12 beşinci sinifdən (hər sinifdən iki komanda) 24 komanda da 140-dan çox şagird iştirak edib.
Təqdimatdan sonra bilik yarışına start verilib. Bir-birindən maraqlı suallar, cavablar, mülahizələr və fikirlər söylənilib. Şagirdlər suallara düzgün və ətraflı cavab verməyə çalışıblar. 3 mərhələ üzrə keçirilən yarışda şagirdlərin sərbəst fikir yürütmələri, çətin suallara verdikləri dolğun cavablar hər kəsi təəccübləndirib.
Yarışı məktəbin şagird, müəllim və bir qrup valideynləri maraqla izləyiblər.
İntellektual bilik yarışında məktəbin 5a sinifinin “Təbriz” komandası birinci, 5h sinifinin “Bilik xəzinəsi ” komandası ikinci, 5h sinifinin “Zəkalar” komandası üçüncü yerə layiq görülüb.
Qaliblər diplom və hədiyyələrlə mükafatlandırılıblar.
Şagirdlərə hədiyyələrini təqdim edən məktəbin direktoru Ədalət Camalova qeyd edib ki, belə yarış və oyunlar şagirdlərin vətənpərvərlik ruhunda, dövlətçilik və vətənə sədaqət ideyaları altında tərbiyə olunması baxımından mühüm əhəmiyyət kəsb edir. Məktəbdə belə yarış və müsabiqələrin mütəmadi təşkil olunduğunu dilə gətirən direktor, bundan sonra da belə tədbirlərin, yarışların keçiriləcəyini vurğulayıb. Ə.Camalova həmçinin 5h sinifinin sinif rəhbəri İnarə Quliyevaya, qalib komandaların tarix müəllimləri Atamoğlan Çıraqov və Aqil Məmmədovaya təşəkkürünü bildirib.
Şamo Əliyev
