Dekabrın 1-də Dini Qurumlarla İş üzrə Dövlət Komitəsinin (DQİDK) Sumqayıt bölgəsi üzrə şöbəsinin təşkilatçılığı ilə Abşeron rayonu Xırdalan şəhəri 3 saylı tam orta məktəbində “Şəhadət” sənədli filminin nümayişi olub.
Tədbirdə DQİDK-nın Sumqayıt bölgəsi üzrə şöbəsinin əməkdaşları Orxan Axundov, İsmayıl Cəfərov, məktəbin direktoru Sevinc Məmmədəliyeva, müəllimlər və yuxarı sinif şagirdləri iştirak ediblər.
Tədbiri giriş sözü ilə açan məktəbin direktoru Sevinc Məmmədəliyeva müxtəlif yollarla təbliğat aparmağa çalışan zərərli dini qrupların cəmiyyət və dövlət üçün təhlükəli olduğunu bildirib. O, şagirdlərin belə zərərli dini cərəyanların təsirinə düşməməsi üçün hər zaman ayıq-sayıq olmalarının vacibliyini diqqətə çatdırıb və bu istiqamətdə aparılan maarifləndirmə tədbirlərini yüksək qiymətləndirib.
Daha sonra çıxış edən DQİDK-nın Sumqayıt bölgəsi üzrə şöbəsinin əməkdaşı İsmayıl Cəfərov din amilindən istifadə edərək yaradılan qarşıdurmaların qarşısını almaq üçün alternativ yollar axtarıb tapmağa hər zamankından daha çox ehtiyac duyulduğunu bildirib. Bu yol isə tolerantlıqdan, birgəyaşayış və həmrəylik ideyalarının təbliğ və təşviq olunmasından keçir. “Şəhadət” sənədli filmi haqqında da ətraflı məlumat verən İ. Cəfərov filmin gənclərin vətənpərvəlik ruhda böyüməsində, yad dini-ideoloji təsirlərdən qorunmasında effektiv təsirə malik olduğunu nəzərə çatdırıb.
Sonda tədbir iştirakçıları ilə qarşılıqlı müzakirələr aparılıb.
