Mehdiabad qəsəbə 4 nömrəli tam orta məktəbdə 10 dekabr - Beynəlxalq İnsan Hüquqları Gününə həsr olunmuş tədbir keçirilib. Tədbirdə təhsil şöbəsinin, Ombudsman aparatının əməkdaşları, məktəbin pedaqoji kollektivi və şagirdlər iştirak ediblər.
Çıxış edən Ombudsman aparatının uşaq hüquqları üzrə müşaviri Nigar Ağayeva Azərbaycan dövləti üçün insan hüquqları prioritet məsələ olduğunu vurğulayıb. Qeyd olunub ki, uşaq hüquqlarının təmini və müdafiəsi sahəsində Ombudsmanın çoxşaxəli fəaliyyət planı mövcuddur. O həmçinin təsisatda uşaqlara qarşı zorakılıqla mübarizə sahəsində görülən işlər və uşaqlarla bağlı 916 qaynar xətt xidmətinin fəaliyyət göstərdiyi diqqətə çatdırıb.
Ombudsman aparatının insan hüquqlarının müdafiə şöbəsinin əməkdaşı Murad Babayev informasiya-kommunikasiya texnologiyalarından düzgün istifadə vərdişlərinin aşılanması, valideynlərin məsuliyyətinin artırılması, uşaqların mobil telefon vasitəsilə internetdən istifadəsinin təhlükəsizliyinin təmin edilməsi barədə ətraflı məlumat verib.
Tədbir şagirdlərin hazırladıqları bədii kompozisiya ilə davam edib.