20 Yanvar faciəsinin 28-ci ildönümü ilə bağlı Xırdalan şəhər 2 nömrəli tam orta məktəbdə anım mərasimi keçirilib.
Əvvəlcə tədbir iştirakçıları məktəbin foyesində şagirdlərin 20 Yanvar faciəsinə həsr olunan rəsmlərindən ibarət sərgiyə baxıblar.
Anım tədbirində çıxış edən məktəbin direktoru Ədalət Camalova 20 Yanvar faciəsinin baş verməsinin siyasi səbəbləri, ağır mənəvi, psixoloji və sosial nəticələri barədə danışıb. Qeyd edilib ki, qanlı hadisənin ertəsi günü xalqımızın ümummilli lideri Heydər Əliyev Azərbaycanın Moskvadakı daimi nümayəndəliyinə gələrək 20 Yanvar faciəsini törədənləri kəskin ittiham edib və regionda baş verən siyasi proseslərin əsl mahiyyətini beynəlxalq ictimaiyyətin diqqətinə çatdırıb. İlk dəfə ulu öndər Heydər Əliyevin təşəbbüsü ilə 20 Yanvar faciəsinə dövlət səviyyəsində siyasi-hüquqi qiymət verilib.
Tədbirdə məktəbin tarix müəllimi Vüsal Kazımov və başqaları çıxış edərək bildiriblər ki, 20 Yanvar faciəsi xalqımızın qan yaddaşından heç vaxt silinməyəcək. Vətənimizin müstəqilliyi, suverenliyi və azadlığı uğrunda şəhid olanların əziz xatirəsi qəlblərdə əbədi yaşayacaq.
Sonra şagirdlərin ifasında 20 Yanvar faciəsinə və şəhidlərinə həsr olunan şeirlər səsləndirilib, ədəbi-bədii kompozisiya nümayiş etdirilib.
Şamo Əliyev