Bakı, 2 mart.
Dövlət İmtahan Mərkəzi (DİM) tərəfindən rezidenturaya qəbul olunmaq istəyən namizədlərin imtahana daha səmərəli hazırlaşmalarına kömək məqsədilə qəbul
imtahanının birinci mərhələsi (baza fənləri üzrə biliklərin qiymətləndiriliməsi) üzrə yeni sınaq imtahanına qeydiyyat başa çatır.
Sınaq imtahanı martın 3-də mərkəzin Nəsimi rayonu, A.Salamzadə küçəsi, 28 ünvanındakı binasında (Bakı Asiya Universitetinin binası) kompüter vasitəsilə elektron
formada keçiriləcək və birinci növbə imtahanı saat 10:00-da, ikinci növbə isə saat 14:00-da başlanacaq.
Sınaq imtahanında iştirak etmək istəyənlər müvafiq olaraq martın 3-də saat 09:00-da və 13:00-dək DİM-in internet saytında qeydiyyatdan keçməklə imtahana yazıla
bilərlər.
Sualların cavablandırılmasına 2 saat 30 dəqiqə vaxt ayrılır.
İmtahanda iştirak etmək istəyənlər DİM-in internet saytında “Şəxsi kabinet”lərini yaratmalıdırlar. “Şəxsi kabinet” bir dəfə yaradılır və daim istifadə edilə bilər. İstifadə
edilmiş xidmətlər, imtahan nəticələri və digər məlumatlar istifadəçinin “Şəxsi kabinet”ində əksini tapacaq. Kabinet yaradılan zaman onun pul hesabı da açılır. Ödəniş
üçün nəzərdə tutulan məbləği “Şəxsi kabinet”də olan hesaba daxil etmək üçün müxtəlif ödəniş üsullarından (ətraflı məlumat payment.dim.gov.az saytında verilib)
faydalanmaq olar.
Sınaq imtahanında yeni test tapşırıqlarından istifadə ediləcək.