Mayın 8-də Xırdaalan şəhər 2 nömrəli tam orta məktəbdə Şuşanın işğal günü ilə bağlı dəyirmi masa keçirilib. Dövlət Himni ilə başlanan tədbirin keçirilməsində məqsəd şagirdlərdə vətənpərvərlik hisslərinin inkişaf etdirilməsi və onlarda tarixi hadisələrə qarşı fikir formalaşdırmaqdır.
Tədbirdə Şuşanın işğalı zamanı həlak olanların xatirəsi bir dəqiqəlik sükutla yad edilib. Çıxış edən məktəbin direktoru Ədalət Camalova Şuşanın işğalı haqqında danışıb. O qeyd edib ki, Şuşa Qarabağın ən gözəl şəhərlərindən biri, bizim mədəniyyət beşiyimizdir. Xalqımızın qəhrəmanlıq tarixinə əvəzolunmaz şəxsiyyətlər yetişdirən bu torpaq həm də zəngin abidələri ilə də seçilirdi. Təəssüflər olsun ki, işğalçılar bizim mədəniyyət abidələrimizi dağıdıb, torpaqlarımızı talan edib, vandalizm aktları törədiblər. Bununla onlar bizim tarixi izlərimizi silmək istəyirlər, amma tarixi silmək mümkün deyil,
Ə.Camalova Azərbaycan Respublikasının Prezidenti, Ali Baş Komandan İlham Əliyevin rəhbərliyi altında ölkəmizin dövlət müstəqilliyinin möhkəmləndirilməsi və ərazi bütövlüyünün bərpası istiqamətində həyata keçirilən ardıcıl siyasət barədə danışıb, işğal olunmuş torpaqlarımızın azad ediləcəyinə əminliyini ifadə edib.
Bildirib ki, Ali Baş Komandanın qətiyyətli mövqeyi nəticəsində Azərbaycanın ərazi bütövlüyü təmin ediləcək.