Azərbaycan Respublikasının Prezidenti cənab İlham Əliyevin sərəncamı ilə 2018-ci ilin Azərbaycan Respublikasında “Azərbaycan Xalq Cümhuriyyəti ili” elan edilməsi ilə əlaqədar Abşeron rayonunun idarə, müəssisə və təşkilatlarında, elm, təhsil və səhiyyə müəssisələrində silsilə tədbirlər təşkil edilib keçirilir.
Abşeron rayonunda növbəti tədbir Saray qəsəbə 19 saylı uşaq bağçasında keçirilib.
Azərbaycan Respublikasının Dövlət himninin səsləndirilməsi başlanan tədbirdə müqəddəs üçrəngli bayrağımız əsgər geyimli körpə fidanların iştirakı ilə səhnəyə gətirilib.
Tədbiri giriş sözü ilə açan bağçanın müdiri Məhbubə Sadıqova qeyd edib ki, 28 may tarixi Azərbaycan xalqının dövlətçilik salnaməsinə qızıl hərflərlə yazılmışdır. 1918-ci ilin 28 may tarixində əsası qoyulan Azərbaycan Xalq Cümhuriyyəti xalqımızın dövlətçilik ənənələrində canlı bir səhifə olmaqla yanaşı onun demokratik ənənələrə sadiqliyinin və azadlıq ruhunun sübutudur. Azərbaycan Respublikasının Prezidenti cənab İlham Əliyevin sərəncamı ilə 2018-ci ilin Azərbaycan Respublikasında “Azərbaycan Xalq Cümhuriyyəti ili” elan edilməsi bu əlamətdar hadisəyə dövlət səviyyəsində layiqincə qiymət verilməsinin bariz nümunəsidir.
Abşeron RİH-in əməkdaşı Samirə İsmayılzadə və Xırdalan şəhər 23 saylı körpələr evi-uşaq bağçasının müdiri Aybəniz Sadıxova çıxış edərək bildiriblər ki, Azərbaycan Xalq Cümhuriyyəti ölkəmizin daxilində və xaricində yaranmış gərgin və mürəkkəb ictimai-siyasi şəraitdə fəaliyyət göstərib. Respublika mövcud olduğu 23 aylıq qısa müddətdə demokratik dövlət və ordu quruculuğu, iqtisadiyyat, təhsil, mədəniyyət və digər sahələrdə mühüm islahatlar həyata keçirib.
Çıxışçılar Azərbaycan Xalq Cümhuriyyətinin xalqımızın qədim dövlətçilik tarixinin şanlı səhifələrindən olduğunu diqqətə çatdırıb, Cümhuriyyətin hüquqi varisi olan müstəqil respublikamızın əldə etdiyi mühüm uğurlardan danışıblar.
Tədbir zamanı bağçanın uşaqlarının hazırladıqları mahnı və şerlərdən ibarət kompozisiya nümayiş etdirilib. Kompozisiyada Cümhuriyyət tarixinin əsas anları, şeir parçaları, mahnılar və nəsr parçaları ilə əks etdirilib. Şənlikdə uşaqların ifasında milli rəqslərimizlə yanaşı, körpə fidanların nümayiş etdirdikləri idman nömrələri də maraqla qarşılanıb.