Abşeron rayon İcra Hakimiyyətinin fəaliyyət planına əsasən Xırdalan şəhər 26 saylı körpələr evi-uşaq bağçasının məktəbə hazırlıq qrupunda ”Ətraf aləmlə tanışlıq” məşğəlsində uşaqlara “Təhlükəsiz həyat” mövzusu tədris edilib.
Rayon ərazisində yerləşən bir neçə məktəbəqədər təhsil müəssisəsinin müdiriləri və tərbiyəçilərinin iştirak etdikləri məşğələdə əvvəlçə bağçanın tərbiyəçisi Təbəssüm Namazova, körpə fidanlara “Fövqəladə halların təsnifatı”, “Zəlzələ zamanı necə davranmalı?”, “Torpaq sürüşməsi zamanı davranış qaydaları”, “Məişətdə yanğın zamanı davranış qaydaları”, “Odsöndürən balonlardan istifadə”, “Dəm qazı”, “Çimərliklərdə təhlükəsizlik qaydaları” və “112” qaynar xətti” mövzularında məlumat verib.
Tərbiyəçi məşğələdə yeni təlim üsullarından və əyani vasitələrdən də istifadə edib. Məşğələdə tədqiqatı aparmaq üçün qruplarla iş aparılıb. Körpə fidanlar qruplara bölünərək, qrup daxilində lider seçiblər. Qruplara tapşırıq və iş vərəqləri paylanılıb. Qruplar öz işlərini təqdim etdikdən sonra tərbiyəçi müəllim tərəfindən onların işi müzakirə olunub.
Məşğələnin sonunda bağçanın müdiri Nigar Səfərova çıxış edərək bildirib ki, məşğələnin məqsədi Azərbaycanın gələcəyi olan nur üzlü körpələrdə təhlükəsiz həyat fəaliyyəti mədəniyyətini formalaşdırmaq, bununla bağlı uşaqlara davranış qaydalarını öyrətmək, müvafiq qaydalarla bağlı onların bilik və bacarıqlarını təkmilləşdirməkdir.
Digər çıxış edənlər "Açıq məşğələ"nin yüksək səviyyədə keçdiyini, “Təhlükəsizlik” ilə bağlı bağçada uşaqlarla geniş iş aparıldığını, nəticədə onlarda bu sahədə kifayət qədər aydın təsəvvürlər formalaşdığını qeyd ediblər.
Çıxışlardan sonra “Uşaqlarımızın həyatını təhlükəyə atmayaq” adlı videoçarx nümayiş olunub.
Tural Kazımlı
