Abşeron rayon İcra Hakimiyyətinin fəaliyyət planına əsasən Xırdalan şəhər 23 saylı körpələr evi-uşaq bağçasının məktəbəhazırlıq qrupunda keçirilən “Ətraf aləmlə tanışlıq” məşğəlsi Azərbaycan Ordusunun yaranmasının 100 illiyinə həsr olunub.
Məşğələdə Abşeron RİH-in əməkdaşı Samirə İsmayılzadə, rayon ərazisində yerləşən bir neçə məktəbəqədər təhsil müəssisəsinin tərbiyəçiləri iştirak etdilər.
Məğələ başlamazdan önçə bağçanın balaca fidanlarının bağçada təşkil etdikləri rəsm sərgisi açılışı və əl işlərinin nümayişi ilə tanışlıq olub. Dövlət himni səsləndirildikdən sonra, dahi şəxsiyyət Heydər Əliyevin xatirəsi toplantı iştirakçıları tərəfindən bir dəqiqəlik sükutla yad edilib.
Sonra məşğələyə baxış keçirilib. Bağçanın metodisti Kifayət Xəlilova və tərbiyəçi Rəfiqə Ağayeva məşğələ zamı körpə fidanlara Azərbaycan Ordusunun yaranması haqqında ətraflı məlumat veriblər. Bildirilib ki, Bu gün Qafqazda ən müasir ordu hesab olunan Azərbaycan Milli Ordusu Hərbi Hava və Hava Hücumundan Müdafiə, Hərbi Dəniz və Quru qoşunlarından ibarətdir. Bu qoşun növləri potensial rəqiblə qırıcı və bombardmançı təyyarələrlə effektiv mübarizə aparmaq iqtidarındadır. MDB çərçivəsində Azərbaycan hava hücumundan müdafiə qüvvələrinə malik ən güclü ölkələrdən sayılır. Büdcə vəsaiti ildən-ilə artırılan Azərbaycan Silahlı Qüvvələrinin buna müvafiq olaraq hərbi imkanları da genişlənir.
Tərbiyəçi məşğələdə yeni təlim üsullarından və əyani vasitələrdən də istifadə edib. Məşğələdə tədqiqatı aparmaq üçün qruplarla iş aparılıb. Körpə fidanlar qruplara bölünüb.
Bağçanın körpə fidanları "Bayrağa sədaqət andı" içərək Azərbaycan Respublikasının bayrağını hər zaman uca tutacaqlarına, yüksəklərdə dalğalanması üçün mübarizə aparacaqlarına söz veriblər.
Sonra bağçanın məzunu olmuş, hal-hazırda Dövlət Sərhəd Xidmətində Horadiz şəhərində yerləşən "N” saylı hərbihissəsində xidmət edən əsgər Rauf Ağayev ilə körpə fidanların görüşü baş tutub.
Azərbaycan Xalq Cümhuriyyətinin ordusuna ən böyük tarixi qiyməti məhz ulu öndər Heydər Əliyevin verdiyini vurğulayan Samirə İsmayılzadə çıxışında qeyd edib ki, dahi şəxsiyyət Heydər Əliyev Naxçıvanda Ali Məclisin sədri olarkən Xalq Cümhuriyyətinin üçrəngli bayrağını Naxçıvan Muxtar Respublikasının dövlət bayrağı elan edib, eləcə də 1918-ci il iyunun 26-da milli ordunun yaranması gününü Azərbaycan Silahlı Qüvvələri Günü kimi təsis edib. Ümummilli lider Heydər Əliyevin siyasi kursunun layiqli davamçısı, Prezident İlham Əliyevin Ali Baş Komandanlığı altında 2016-cı ilin Aprel döyüşlərində Azərbaycan Ordusu cəbhənin müxtəlif istiqamətlərində düşmənə ağır zərbələr endirib, Silahlı Qüvvələrimizin gücü Ermənistana və dünyaya nümayiş olunub.
"Bizim çox güclü ordumuz var", - deyən bağçanın müdiri Aybəniz Sadıxova bildirib ki, körpə balalarımızın bu gün içdikləri bayrağa sədaqət andı gələcəkdə hərbi andla birləşərək daha dönməz olacaqdır. “Vətən və bayraq sevgisi qoşadır. Dünya dövlətləri arasında ancaq bizdə bayrağa sədaqət andı içilir. Bu and insanların milli ruhunun yaşarılığı deməkdir. Onu daim ucalarda tutub, müqəddəsliyinin keşiyində dayanmaq hər birimizin vətəndaşlıq borcudur.”
Məşğələ uşaqların ordumuzun 100 illiyinə həsr olunmuş çıxışları, şeirlər və vətənpərvərlik yönümlü musiqi nömrələriylə başa çatıb.
