Xırdalan şəhər 4 saylı tam orta məktəbdə 1 İyun – Uşaqların Beynəlxalq Müdafiəsi Gününə həsr olunmuş bayram şənliyi keçirilib. Bayram şənliyində rayon İcra Hakimiyyətinin rəsmiləri, Təhsil Şöbəsinin əməkdaşları və məktəbin pedoqoji kollektivi iştirak ediblər.
Mərasim iştirakçıları əvvəlcə məktəbin həyətində təşkil olunan 1 ç snifinin şagirdlərinin hazırladığı fləşmob-a tamaşa ediblər.
Azərbaycan Respublikasının Dövlət himninin səsləndirilməsi ilə başlanan tədbirdə çıxış edən məktəbin direktoru Zəminə Nuriyeva və RTŞ-nın metodisti Sevil Əliyeva uşaqları bayram münasibətilə təbrik edib onlara xoş arzularını çatdırıblar.
Qeyd edilib ki, Azərbaycanda Uşaq siyasətinin əsası Ümummillli Lider Heydər Əliyev tərəfindən qoyulmuşdur. Azərbaycan körpələri hər il Heydər Əliyevlə olan görüşlərdən sonsuz coşqu və böyük ilham alırdılar. Bu səmimi görüşlər hər bir uşağın yaddaşında əbədi iz qoymuşlar.
Uzaqgörən siyasi lider olan Heydər Əliyevin yaratdığı və nəsillər üçün miras qoyduğu ənənələr bu gün də uğurla davam etdirilir. Azərbaycan Prezidenti cənab İlham Əliyevin Uşaq hüquqlarının müdafiəsi sahəsində atdığı addımlar, Azərbaycan Respublikasının Birinci vitse-prezidenti Mehriban xanım Əliyevanın gördüyü işlər bu ənənələrin hələ uzun illər yaşayıcağına və Azərbaycan uşaqlarının taleyində əhəmiyyətli rol oynayacağına zəmanət verir.
Məktəbin müəllimi Nəzakət Əliyevanın təşkilatçılığı ilə hazırlanan tədbirdə uşaqların nümayiş etdirdikləri nağıl qəhrəmanlarının personajları, şeirlər, mahnılar, rəqslər və səhnəciklər tədbir iştirakçılarında xoş əhval-ruhiyyə yaradıb.
Tural Kazımlı