Abşeronda məktəbəqədər təhsil müəssisələrinin fəaliyyətə başlaması üçün hazırlıq işləri görülür

Abşeron rayonunda körpələr evi-uşaq bağçalarının fəaliyyətə başlaması istiqamətində hazırlıq işləri görülür.

Bildirilib ki, Nazirlər Kabineti yanında Operativ Qərargahın qərarına əsasən, oktyabrın 1-dən uşaq bağçalarının tam açılması nəzərdə tutulur. Bununla əlaqədar olaraq rayon ərazisindəki dövlət məktəbəqədər təhsil müəssisələrində müvafiq sanitar-gigiyenik normalara və xüsusi karantin rejiminin tələblərinə əməl edilməklə dezinfeksiya işləri aparılıb.

Uşaq bağçalarının tərbiyəçiləri və texniki işçiləri iş yerlərində geniş təmizlik, iməcilik, tibbi-profilaktik işlər görüb. İşçi heyət hazırkı şəraitdə işləmək qaydaları barədə təlimatlandırılıb. Məktəbəqədər təhsil müəssisələrinin həyətləri, yataq, oyun, mətbəxləri və digər otaqları təmizlənib. Otaqların havalandırılması və təlimata uyğun dezinfeksiyası üçün tədbirlər həyata keçirilib. Bütün bu görülən işlərə Abşeron RİH-nin və Rayon Gigiyena və Epidemiologiya Mərkəzinin əməkdaşları nəzarət edir.

Bundan əlavə, bağçalar xüsusi dezinfeksiyaedici məhlullarla təmin olunub və məktəbəqədər müəssisələr fəaliyyətə başladığı zaman onlar bağçanın girişinə qoyulacaq. Bağçalar açıldıqdan sonra xüsusi karantin rejiminin tələblərinə uyğun şəkildə fəaliyyət göstərəcək.