Türkiyənin Bursa şəhərində Ulu Öndər Heydər Əliyevin anadan olmasının 99-cu ildönümü ilə əlaqədar tədbir keçirilmişdir. Tədbirə qardaş ölkədəki diaspora üzvləri və ictimaət nümayəndələri qatılmışlar.İştirakçılar Uludağın ətəyində yerləşən Heydər Əliyev Parkını ziyarət edərək Ümummilli Liderin abidəsi önünə əklil qoymuş, xatirəsini ehtiramla yad etmişlər.
Daha sonra Azərbaycan və Türkiyənin dövlət himnləri səsləndirilmişdir. Tədbirdə çıxış edənlər bildirmişlər ki, gündən-günə qüdrətini artıran müasir, müstəqil Azərbaycan Ulu Öndərin şah əsəridir. Heydər Əliyevin adını daşıyan Bursa parkı Türkiyədə Azərbaycan dəyərlərini, onun siyasi liderlərini uca tutan doğma bir ocaq kimi bursalılar tərəfindən əzizlənir, məhəbbətlə qorunur.
Çıxış edənlər türk dünyasının böyük oğlu Heydər Əliyevin iki ölkə arasındakı münasibətlərin inkişafındakı misilsiz xidmətlərini qeyd etmiş, Bursada ucaldılan abidənin Türkiyənin XX əsrin türk dünyasının ən güclü siyasi xadiminin xatirəsinə göstərdiyi ehtiramın və sonsuz sevginin təzahürü kimi dəyərləndirmişlər.
Qeyd olunmuşdur ki, 44 günlük Vətən Müharibəsi başladığı gündən etibarən qardaş ölkə ictimaiyyəti Azərbaycanın haqlı və ədalətli mövqeyini müdafiə etmiş, həm reallıqların dünya ictimaiyyətinə çatdırılmasında, həm də erməni yalanlarının ifşasında yüksək fəallıq nümayiş etdirmişdir. Prezident Rəcəb Tayyib Ərdoğan müxtəlif tribunalardan Azərbaycanın haqq işinə prinsipial dəstəyini ifadə etməklə beynəlxalq ictimaiyyətin diqqətini obyektiv gerçəkliklərə, tarixi, siyasi və mənəvi həqiqətlərə yönəltmişir.
Eyni zamanda Azərbaycan da öz növbəsində qardaş Türkiyəyə milli-strateji və prinsipial məsələlərdə güclü dəstək nümayiş etdirir. Ümumiyyətlə, dünyada Azərbaycan ilə Türkiyə qədər bir-birinə yaxın ölkələr yoxdur. Milli dəyərlər və tarixi ənənələr üzərində təşəkkül tapmış bu qardaşlıq münasibətləri bənzəri olmayan birlik və həmrəylik nümunəsidir.
