Azərbaycan Prezidenti İlham Əliyev Laos Xalq Demokratik Respublikasının Prezidenti Thonqlun Sisulitin Azərbaycana rəsmi səfəri çərçivəsində mətbuata bəyanatla çıxış edərək iki ölkə arasında siyasi, iqtisadi, təhsil, nəqliyyat, energetika və digər sahələrdə əməkdaşlığın genişləndirilməsi perspektivlərindən danışıb. Dövlət başçısı bildirib ki, səfər zamanı keçirilən təkbətək və geniştərkibli görüşlərdə mühüm məsələlər müzakirə olunub, gələcək əməkdaşlığın əsas istiqamətləri müəyyənləşdirilib.
Prezident İlham Əliyev qeyd edib ki, qəbul edilən Birgə Bəyanat Azərbaycan ilə Laos arasında gələcək əməkdaşlığın prioritetlərini özündə əks etdirir və ikitərəfli münasibətlərin daha da dərinləşdirilməsi üçün mühüm əhəmiyyət daşıyır. Dövlət başçısı Laos Prezidentinin dəvəti qəbul edərək Azərbaycana rəsmi səfərə gəlməsini yüksək qiymətləndirib və bu səfərin əlaqələrin inkişafına müsbət təsir göstərəcəyinə əminliyini ifadə edib.
İlham Əliyev vurğulayıb ki, iki ölkə arasında diplomatik münasibətlər 30 ildən artıqdır uğurla davam edir. Bu müddət ərzində tərəflər beynəlxalq təşkilatlar çərçivəsində qarşılıqlı dəstək və həmrəylik nümayiş etdirib, siyasi dialoqun inkişafına töhfə veriblər. Parlamentlərarası əlaqələrin möhkəmləndiyini, hər iki ölkədə dostluq qruplarının yaradıldığını və hakim partiyalar arasında əməkdaşlığın mövcud olduğunu bildirən Prezident siyasi münasibətlərin yüksək səviyyəsinin digər sahələrdə də əməkdaşlığın genişləndirilməsi üçün əlverişli zəmin yaratdığını qeyd edib.
Dövlət başçısı iqtisadi əlaqələrin mövcud potensialının tam əks olunmadığını diqqətə çatdırıb. Onun sözlərinə görə, hazırkı ticarət dövriyyəsi nə iki ölkənin imkanlarına, nə də tərəflərin əməkdaşlığı genişləndirmək niyyətinə uyğundur. Bu səbəbdən iqtisadi sahədə, xüsusilə ticarət dövriyyəsinin artırılması istiqamətində konkret addımların atılması barədə razılıq əldə olunub. Bakıda keçirilməsi nəzərdə tutulan Laos-Azərbaycan biznes-forumunun işgüzar əlaqələrin genişləndirilməsinə, məlumat mübadiləsinin gücləndirilməsinə və yeni tərəfdaşlıqların qurulmasına töhfə verəcəyi gözlənilir.
Prezident İlham Əliyev Azərbaycanın xarici ölkələrə investisiya qoyuluşlarının ildən-ilə genişləndiyini vurğulayaraq bildirib ki, Laos tərəfindən Azərbaycan investorlarına konkret layihələr təqdim ediləcəyi təqdirdə, həmin təşəbbüslərə böyük maraqla baxıla bilər. Dövlət başçısı qeyd edib ki, Azərbaycanın sərmayələri yeni iş yerlərinin açılmasına və istehsal sahələrinin yaradılmasına imkan verir. Bu təcrübənin ikitərəfli əməkdaşlıq çərçivəsində tətbiqi də qarşılıqlı faydalı nəticələr verə bilər.
İki ölkəni birləşdirən mühüm məsələlərdən biri də mina təhlükəsizliyidir. Prezident İlham Əliyev qeyd edib ki, Laos müharibədən onilliklər keçməsinə baxmayaraq, bu gün də minaların ağır nəticələri ilə üzləşir. Azərbaycanın da Ermənistanın işğalı dövründə ərazilərində basdırılmış minalardan ciddi zərər çəkdiyini bildirən dövlət başçısı bir milyondan çox minanın mövcudluğunu və son 5-6 il ərzində 400-dən çox azərbaycanlının mina partlayışları nəticəsində həlak olduğunu və ya ağır yaralandığını diqqətə çatdırıb. O vurğulayıb ki, bu sahədə təcrübə mübadiləsi, müasir texnologiyaların tətbiqi və mütəxəssislər üçün təlimlərin təşkili qarşılıqlı əməkdaşlığın mühüm istiqamətlərindən biri ola bilər.
Nəqliyyat və logistika sahəsində əməkdaşlıq perspektivlərinə toxunan Prezident Azərbaycanın əsas nəqliyyat-logistika layihələrinin artıq reallaşdırıldığını bildirib. Hazırda diqqətin yeni yük mənbələrinin cəlb edilməsinə, alternativ istiqamətlərdən yüklərin səfərbər olunmasına və daşımaların həcminin artırılmasına yönəldiyini qeyd edən dövlət başçısı Laosun qonşu ölkələrlə dəmir yolu bağlantılarının inkişaf etdirilməsinin gələcəkdə Trans-Xəzər nəqliyyat marşrutuna çıxış imkanlarını genişləndirə biləcəyini vurğulayıb. Onun sözlərinə görə, hər iki tərəfdə nəzərdə tutulan layihələrin tamamlanması yükdaşımaların artmasına şərait yarada bilər.
Bununla yanaşı, energetika, mədənçilik, kənd təsərrüfatı və digər sahələrdə əməkdaşlıq imkanları da müzakirə olunub. Prezident İlham Əliyev bu istiqamətlər üzrə real nəticələrin əldə edilməsi üçün konkret addımların atılmasının vacibliyini qeyd edərək, tərəflər arasında qarşılıqlı iradənin və əməkdaşlıq imkanlarının mövcud olduğunu bildirib.
Dövlət başçısı Laosun Azərbaycan üçün dost ölkə olduğunu xüsusi vurğulayıb. O, iki ölkə arasında uzun illərdir davam edən diplomatik münasibətlərin və qarşılıqlı dəstəyin bu dostluğun göstəricisi olduğunu bildirib. Prezident Thonqlun Sisulitin Azərbaycana səfərinin və oktyabrın 15-də keçiriləcək Zirvə görüşündə iştirakının əlaqələrin daha da möhkəmləndirilməsinə xidmət edəcəyini qeyd edib. Eyni zamanda, Laos Prezidentinin ötən əsrin 1980-ci illərində Azərbaycanda olduğunu xatırladan İlham Əliyev bunun Laos dövlət başçısının ölkəmizə ilk rəsmi səfəri olduğunu diqqətə çatdırıb.
Beləliklə, Azərbaycan-Laos münasibətlərinin yeni mərhələyə yüksəldilməsi, iqtisadi əlaqələrin intensivləşdirilməsi, investisiya imkanlarının genişləndirilməsi və humanitar əməkdaşlığın gücləndirilməsi səfərin əsas istiqamətlərini təşkil edir. Qəbul edilən Birgə Bəyanat və əldə olunan razılaşmaların qarşıdakı dövrdə konkret layihələrlə möhkəmləndirilməsi iki ölkə arasında tərəfdaşlığın inkişafı baxımından mühüm əhəmiyyət daşıyır.
Şahin Tağıyev
Abşeron rayon Novxanı kənd bələdiyyəsinin sədri
