Hər il 2 fevral Azərbaycanda Gənclər Günü kimi qeyd edilir. Bu əlamətdar gün Ulu Öndər Heydər Əliyevin 1997-ci ildə imzaladığı Sərəncamla təsis edilib və həmin vaxtdan etibarən ölkədə gənclərin inkişafına yönəlmiş siyasətin rəmzinə çevrilib. Bu gün gənclərin cəmiyyətin müxtəlif sahələrində fəallığını artırmaq, onların potensialını üzə çıxarmaq və dövlətin inkişafında iştirakını genişləndirmək məqsədi daşıyır. Azərbaycan dövləti müstəqillik illərindən etibarən gənclərin hərtərəfli inkişafını prioritet məsələlərdən biri kimi müəyyən edib və bu istiqamətdə davamlı siyasət yürüdür.
Heydər Əliyevin əsasını qoyduğu gənclər siyasəti onların təhsilinə, istedadlarının üzə çıxarılmasına, vətənpərvərlik ruhunda böyüməsinə və sosial fəallığının artırılmasına yönəlib. Bu siyasət Prezident İlham Əliyev tərəfindən uğurla davam etdirilir. Gənclərin təhsil imkanlarının genişləndirilməsi, onların peşəkar inkişafına şərait yaradılması və beynəlxalq təcrübənin öyrənilməsi məqsədilə müxtəlif dövlət proqramları həyata keçirilir. Xaricdə təhsil almaq istəyən gənclər üçün yaradılmış “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı” bu sahədə ən mühüm təşəbbüslərdən biri olub. Hazırda “2022-2026-cı illər üçün Azərbaycan gənclərinin xaricdə təhsili üzrə Dövlət Proqramı” çərçivəsində yüzlərlə gənc dünyanın nüfuzlu universitetlərində təhsil almaq imkanı qazanır. Bundan əlavə, gənclərin ictimai fəallığını artırmaq və onların təşəbbüslərini dəstəkləmək üçün bir sıra layihələr həyata keçirilir. 2011-ci ildə yaradılmış Azərbaycan Respublikasının Gənclər Fondu gənclərin sosial və mədəni inkişafına yönəlmiş layihələrə maliyyə dəstəyi verir. Fondun təşkil etdiyi müxtəlif qrant müsabiqələri minlərlə gəncin fərdi ideyalarının reallaşdırmasına imkan yaradıb.
Azərbaycan gəncləri ölkənin ictimai-siyasi, sosial və mədəni həyatında mühüm rol oynayır. Onlar təkcə elmi və innovativ layihələrdə deyil, həm də ölkənin müdafiəsi və beynəlxalq arenada təbliğatı sahəsində böyük uğurlar əldə ediblər. Xüsusilə 44 günlük Vətən müharibəsi zamanı gənclər ön cəbhədə və arxa cəbhədə əsl qəhrəmanlıq göstərərək Azərbaycanın ərazi bütövlüyünün bərpasında müstəsna rol oynadılar. Eyni zamanda, informasiya müharibəsində sosial şəbəkələr vasitəsilə Azərbaycanın haqq səsini dünyaya çatdırdılar. Müharibədən sonra işğaldan azad edilmiş ərazilərin yenidən qurulmasında gənclər fəal iştirak edirlər. Eyni zamanda, 2023-cü ilin dekabrında Laçın yolunda Dağlıq Qarabağ ərazisindəki faydalı qazıntı yataqlarının qanunsuz istismarının dayandırılması məqsədilə keçirilən etiraz aksiyalarında da onların rolu böyük olub. Aksiyada müxtəlif könüllü təşkilatların və ictimai birliklərin nümayəndələri iştirak edib. Fəallıq göstərən təşkilatlar arasında “Azərbaycan Könüllü Təşkilatları İttifaqı”, “Bakı Dövlət Universiteti Könüllüləri” və “Miqrasiya Könüllüləri”ni xüsusi qeyd etmək olar.
Bundan əlavə, 2023-cü ilin fevralında qardaş Türkiyə Respublikasında baş verən zəlzələ zamanı Azərbaycan könüllüləri böyük fədakarlıq nümayiş etdiriblər. Bir ay ərzində 150 könüllüdən ibarət Azərbaycan nümayəndə heyəti on minlərlə zərərçəkmişə müxtəlif humanitar yardımlar göstərib. Xüsusi vurğulamaq lazımdır ki, bu, Azərbaycan gənclərinin həm müddət, həm də iştirakçı sayı baxımından xarici ölkədə təşkil olunmuş ən genişmiqyaslı humanitar yardım fəaliyyəti kimi tarixə düşüb.
Azərbaycan dövləti gənclərin innovasiya və sahibkarlıq sahəsində uğur qazanmasına da xüsusi diqqət yetirir. Son illərdə startap ekosisteminin inkişafı üçün yaradılan fondlar və təşəbbüslər gənc sahibkarların öz ideyalarını reallaşdırmasına kömək edir. Azərbaycan Respublikasının Kiçik və Orta Biznesin İnkişafı Agentliyi (KOBİA) tərəfindən həyata keçirilən müxtəlif dəstək proqramları gənc sahibkarların fəaliyyətini stimullaşdırır. Bundan başqa, texnologiya sahəsində istedadlı gənclərin inkişafı üçün müxtəlif hakatonlar və innovativ müsabiqələr təşkil edilir.
Bu gün Azərbaycan gəncləri müasir biliklərə yiyələnir, milli dəyərlərinə sadiq qalaraq ölkənin gələcəyinin formalaşmasında mühüm rol oynayır. Onlar dövlətin yaratdığı imkanlardan maksimum faydalanaraq təhsil, elm, idman, innovasiya və sahibkarlıq sahələrində böyük uğurlar qazanırlar. Azərbaycan gənclərinin beynəlxalq tədbirlərdə aktiv iştirakı, idmanda qazandığı nailiyyətlər və texnoloji yeniliklər sahəsindəki uğurları onların potensialının göstəricisidir.
Gənclər Günü yalnız bir bayram deyil, həm də onların cəmiyyət üçün nə qədər əhəmiyyətli olduğunu vurğulayan bir gündür. Bu gün gənclərin uğurlarını dəyərləndirmək, onların qarşısında açılan yeni imkanları müzakirə etmək və gələcək inkişaf üçün yeni hədəflər müəyyənləşdirmək baxımından xüsusi əhəmiyyət kəsb edir. Azərbaycan dövləti gənclərə verdiyi dəyəri onların uğurları ilə təsdiqləyir və bu siyasətin davamlı olması üçün ardıcıl addımlar atır.
Günay Niyazova
Gənclərin İnkişaf və Karyera Mərkəzinin
Abşeron-Xızı regional nümayəndəliyinin
Abşeron bölməsinin mütəxəssisi
