17 iyun Tibb İşçilərinin Peşə Bayramı Günü münasibətilə Abşeron Rayon İcra Hakimiyyətinin başçısı Abdin Fərzəliyev səhiyyə sahəsində çalışan şəhid ailələri ilə görüşüb.
Görüş zamanı RİH başçısı Abdin Fərzəliyev bildirib ki, xalqımızın Ümummilli Lideri Heydər Əliyevin 2001-ci il iyunun 4-də imzaladığı Sərəncama əsasən hər il ölkəmizdə 17 iyun tarixi Tibb İşçilərinin Peşə Bayramı Günü kimi qeyd olunur. Ümummilli Lider Heydər Əliyevin bu sahəyə ayırdığı diqqət sahəsində Azərbaycan səhiyyəsi çox böyük inkişaf yolu keçib. Bu gün digər sahələrdə olduğu kimi, səhiyyə sahəsi də Ulu Öndərin siyasi kursunun davamçısı, Azərbaycan Respublikasının Prezidenti cənab İlham Əliyevin diqqət və qayğısı nəticəsində özünün yeni inkişaf mərhələsini yaşayır. Son illər yüzlərlə tibb müəssisəsinin tikilərək istifadəyə verilməsi, onların maddi-texniki bazasının gücləndirilməsi, yeni tibbi texnologiyaların ölkəmizə gətirilməsi, tətbiqi və həyata keçirilən islahatlar respublikamızda bu sahəyə dövlət tərəfindən böyük qayğının göstərilməsindən xəbər verir.
Qeyd edilib ki, səhiyyə sahəsində bir sıra dövlət proqramlarının reallaşdırılmasında respublikamızın Birinci vitse-prezidenti Mehriban Əliyevanın rəhbərlik etdiyi Heydər Əliyev Fondunun müstəsna xidmətləri vardır. Belə ki, Fond diabetli, talassemiyalı xəstələrə qayğı və onların müalicəsinin təşkilində, qanvermə aksiyalarının keçirilməsində, ana və uşaqların sağlamlığının qorunması işinin yaxşılaşdırılmasında bir çox böyük layihələrə imza atıb.
Daha sonra 17 iyun Tibb İşçilərinin Peşə Bayramı Günü münasibətilə səhiyyə sahəsində çalışan şəhid ailələrinə Abşeron Rayon İcra Hakimiyyəti tərəfindən mükafat və gül dəstələri verilib, xatirə şəkilləri çəkilib.
Qeyd edək ki, 17 iyun – Tibb İşçilərinin Peşə Bayramı Günü münasibətilə Abşeron Rayon İcra Hakimiyyətinin və "Abşeron Rayon Mərkəzi Xəstəxanası" publik hüquqi şəxsin birgə təşkilatçılığı ilə Abşeron Rayon Mərkəzi Xəstəxanasında da tədbir keçirilib. Tədbir çərçivəsində bir qrup tibb işçisi uzunmüddətli səmərəli fəaliyyətlərinə görə RİH tərəfindən Fəxri Fərmanlar, Rayon Mərkəzi Xəstəxanası tərəfindən isə təşəkkürnamələrlə təltif olunub.
