Abşeron Rayon İcra Hakimiyyətinin (RİH) və Üzümçülük və Şərabçılıq Elmi Tədqiqat İnstitutunun (ÜŞETİ) birgə təşkilatçılığı ilə baş tutan sahəvi görüşdə üzüm və şərab istehsalı ilə məşğul olan sahibkarlar və torpaq mülkiyyətçiləri iştirak ediblər.
Maarifləndirici görüşdə şərabçılığın mikrozonalara ayrılması və tanıdılmasının əhəmiyyəti barədə üzümçülüklə məşğul olan torpaq mülkiyyətçiləri və sahibkarlara geniş məlumat verilib.
Dövlətimiz tərəfindən üzümçülük və şərabçılığın inkişafı ilə bağlı ardıcıl proqramların qəbul edildiyini, onlardan sonuncusunun 2018-2025-ci illəri əhatə edən Azərbaycan Respublikasında şərabçılığın inkişafına dair Dövlət Proqramı olduğunu vurğulayan ÜŞETİ-nin direktoru Vüqar Səlimov qeyd edib ki, Abşeron ərazisində fəaliyyət göstərən ÜŞETİ-nin əməkdaşlarının Ampeloqrafik Kolleksiya Bağında yetişdirilən texniki üzüm sortları üzərində (Mədrəsə, Xindoqnı, Həməşəra, Bayanşirə, Şirvanşahı, Göy-göl, Kəpəz, Bəhrəli, Şirəli, Mələyi, Rkasiteli və s.) apardığı tədqiqatlar nəticəsində həmin sortların yerli şəraitdə texniki üzümə xarakterik olan biokimyəvi tərkibə malik olduqları müəyyən edilmiş və onlardan müxtəlif növ eksperimental şərab nümunələri hazırlanmışdır.
V.Səlimov həmçinin bildirib ki, Abşeron şəraitində yetişdirilən texniki üzüm sortlarının tənəkləri normal inkişaf edərək, yüksək və keyfiyyətli məhsul verməklə yanaşı, onlardan yüksək keyfiyyətli, xarakterik süfrə, tünd və desert şərablar istehsal etmək mümkündür. Əgər bu tədqiqatların nəticələri geniş istehsalata tətbiq olunarsa və praktiki əhəmiyyəti patentləşdirilərsə gələcəkdə Abşeron bölgəsini də şərabçılıq bölgəsi kimi xarakterizə etmək olar.
Sonda sahibkarların təklifləri dinlənilib və onları maraqlandıran suallar cavablandırılıb.
