Abşeron Rayon İcra Hakimiyyəti, Azərbaycan Respublikasının Qida Təhlükəsizliyi Agentliyi və Abşeron Rayon Mərkəzi Xəstəxanası tərəfindən “Azərbaycan Respublikasında qida təhlükəsizliyinin təmin edilməsinə dair 2019-2025-ci illər üçün Dövlət Proqramı”nın Tədbirlər Planının 10.12.3, 10.12.4 və 10.12.5-ci bəndlərinin icrası ilə əlaqədar Abşeron rayonunda bir sıra maarifləndirici tədbirlər həyata keçirilib.
Rayon ərazisində qida təhlükəsizliyi sahəsində əhalinin maarifləndirilməsi, istehlakçı hüquqlarının müdafiəsi, qida məhsullarının düzgün konservləşdirilməsi və saxlanılması istiqamətində genişmiqyaslı tədbirlər təşkil olunub. Xırdalan şəhəri ilə yanaşı rayonun 16 kənd və qəsəbəsində əhali arasında, eləcə də orta ümumtəhsil və məktəbəqədər təhsil müəssisələrində görüşlər keçirilib, maarifləndirici posterlər paylanılıb və videoçarxlar hazırlanaraq nümayiş etdirilib.
Tədbirlər zamanı “Şəkəri azalt, ömrünü uzat!”, “Şəkərin zərərləri”, “Şəkər əvəzediciləri”, “Gündəlik qida rasionunda meyvə-tərəvəzin əhəmiyyəti” və “Sağlam qidalanma” mövzularında təqdimatlar təşkil olunub. Həmçinin ticarət və ictimai iaşə obyektlərində keçirilən görüşlərdə məsul şəxslərə qida məhsullarının düzgün konservləşdirilməsi və saxlanılması qaydaları, sanitariya-gigiyena normalarına riayət olunmasının vacibliyi barədə ətraflı məlumat verilib.
Əhali arasında aparılan maarifləndirmə işləri çərçivəsində ev şəraitində konservləşdirmə zamanı sanitariya qaydalarına əməl olunmasının əhəmiyyəti, botulizm riski və onun əsas əlamətləri – ikiqat görmə, nitq pozuntusu və digər hallarla bağlı məlumatlandırma aparılıb. Eyni zamanda, deformasiyaya uğramış qablaşdırmalardan istifadənin yolverilməz olduğu və məhsulların düzgün saxlanılması qaydaları vətəndaşların diqqətinə çatdırılıb.
Görülən tədbirlər qida zəhərlənmələrinin qarşısının alınmasına, sanitariya-gigiyena qaydalarına riayət olunmasının təmin edilməsinə və əhalinin sağlamlığının qorunmasına xidmət edir. Bu istiqamətdə maarifləndirmə tədbirləri aidiyyəti qurumlar tərəfindən davam etdirilir.
