Səliqə-sahman, təmizlik bizə irsi keçən, babalarımızdan, nənələrimizdən qalma xüsusiyyətlərdəndir. Təmizliyə evimizin içindən başlasaq da, qapımızı açıb çölə boylananda hər yeri-həyətimizi, küçəmizi, məhəlləmizi, bütünlükdə vətən torpağınının hər bir qarışını abad, baxımlı, bəslənmiş, gülə-çiçəyə bürünmüş görmək istəyi keçir qəlbimizdən... Bunu yaratmaq və qorumaq isə hər birimizin borcudur... Atalarımız yaxşı deyib : “Bağa baxarsan bağ olar, baxmazsan dağ”...
Rayon ərazisində sağlam ekoloji mühitin yaradılması məqsədilə mühüm tədbirlər həyata keçirilir. Abşeron rayonunda məişət tullantılarının atılması üçün 500-dən çox məntəqədə 1500-ə yaxın zibil qutusu yerləşdirilib. Məsələ burasındadır ki, rayonda 700 minə yaxın sakin yaşayır. Hər sakinin evi olan Abşeronun təmiz qalmasında onların rolu böyükdür. Amma insanlar tullantıları nəzərdə tutulan qutulara deyil, kənarlara atırlar. Görünən mənzərə isə ürəkaçan olmur. Səliqəsislik və tullantıların yaratdığı pis qoxu narahatlıq yaradır. Gündə 3 dəfə maşınlar tərəfindən yığılan məişət tullantıları "Balaxanı poliqonu"na daşınır. Buna baxmayaraq, Abşeron rayon İcra Hakimiyyətinin Mənzil-Kommunal Təsərrüfatı idarəsinin əməkdaşları tərəfindən mütəmadi olaraq şifahi və yazılı xəbərdarlıq olunsa da, bəzi sakinlər buna məhəl qoymurlar.Vətəndaşlar təmizliyə riayət etsələr, zibili qutulara atsalar, təmizlik işçiləri o zibili yerdən yox, qutulardan daha tez götürə bilərlər .
Belə demək mümkünsə, ümumiyyətlə, insanlar zibili qutulara deyil, yerə atmağa bir növ adət ediblər. Binaların, küçələrin arxasında zibil qabları olsa da insanlar əllərindəki əşyaları, zibili hara gəldi atırlar. Kimisi içdiyi su qabını, çəkdiyi siqaretin kötüyünü küçəyə atır. Hətta çoxmərtəbəli binanın sakinləri pampersi, salafana bükülmüş zibili elə yuxarıdanca yerə atır. Belələrinə isə irad bildirəndə elə cavab verirlər ki, deməyinə də peşman olursan. Çox təəssüf, bu adamlar başa düşmək istəmir ki, zibili, tullantıları müvafiq yerlərə qoymaq, ətrafı təmiz saxlamaq bir mədəniyyətdir. Bu mədəniyyət uzun illər öncədən xarici ölkələrdə ciddi şəkildə formalaşıb.
