Ölkə rəhbəri cənab İlham Əliyevin qeyd etdiyi kimi düzgün statistik məlumatlar, vəziyyətin dolğun analizi olmadan müxtəlif sahələrdə , o cümlədən sosial-iqtisadi, demoqrafik və istənilən digər sahələrdə inkişafın və perspektivlərin dəqiq planlaşdırılmasına nail olmaq mümkün deyil. Belə ki, Statistika vasitəsilə müxtəlif iqtisadi göstəricilər , o cümlədən Ümumi Daxili Məhsul, İnflyasiya səviyyəsi, İşsizlik dərəcəsi, İxrac və idxal göstəriciləri ölçülür ki, bu göstəricilər ölkənin iqtisadi sağlamlığını göstərir və islahatların zəruriliyini ortaya qoyur. Bundan başqa statistika investorlar üçün məlumat bazası yaradır. Daxili və xarici investorlar statistik göstəricilərə əsasən ölkədəki iqtisadi sabitliyi və investisiya mühitini dəyərləndirirlər. Statistika eyni zamanda statistik göstəricilər vasitəsi ilə əhalinin gəlir səviyyəsi, istehlak xərcləri, yaşayış şəraiti kimi sahələrdə real vəziyyəti ortaya çıxarır, regionlararası inkişaf fərqlərinin müəyyən olunmasını, regionlar üzrə iqtisadi inkişaf göstəricilərini təqdim edərək geri qalmış bölgələrə xüsusi diqqət ayrılmasına resursların daha ədalətli bölgüsünə imkan yaradır, beynəlxalq müqayisələr və inteqrasiyalara şərait yaradır, həmçinin ölkənin statistik göstəriciləri beynəlxalq təşkilatlar tərəfindən istifadə olunur ki, bu göstəricilər də ölkənin iqtisadi və sosial vəziyyətinin beynəlxalq səviyyədə tanıdılmasına şərait yaradır. Statistik məlumatlar beynəlxalq təşkilatlar üçün ölkənin “rəqəmsal pasportu” rolunu oynayır. Bu məlumatlar dəqiq və şəffaf olduqda, ölkə daha yaxşı tanınır, statistik göstəricilər ölkənin beynəlxalq layihələrə, qlobal təşəbbüslərə uyğunluğunu sübut edir, daha uğurlu iqtisadi və sosial inkişaf yolu seçə bilir. Bütün bunları nəzərə alaraq ölkədə statistikanın inkişafına böyük diqqət ayrılır. Bu işdə statistik vahidlərin də əhəmiyyətli rolu var.
Belə demək olar ki, statistik vahidlərin təqdim etdikləri məlumatlar statistikanın təməl daşlarıdır. Statistik vahidlər statistik müşahidə zamanı məlumatların toplandığı əsas obyektlərdir. Bu obyektlər düzgün müəyyənləşdirildikdə, tələb edilən məlumatları vaxtında və təhrif olunmadan təqdim etdikdə toplanan məlumatlar daha etibarlı və istifadə edilə bilən olur. Bu isə öz növbəsində ölkə səviyyəsində dəqiq iqtisadi və sosial analizlərin aparılmasına şərait yaradır.
Təvəkkül Mirzəyev,
Abşeron rayon Statistika idarəsinin rəisi
