Abşeron rayonu, Saray qəsəbə 4 nömrəli tam orta məktəbdə Vətən müharibəsi qaziləri ilə 3A sinif şagirdlərinin görüşü keçirilib.Tədbir Ümummilli Lider Heydər Əliyevin və Azərbaycan Respublikasının ərazi bütövlüyü, müstəqilliyi və suverenliyi uğrunda canlarından keçmiş şəhidlərimizin əziz xatirəsinin bir dəqiqəlik sükutla yad edilməsi ilə başlayıb. Ardınca Dövlət Himni səsləndirilib.
Görüşün keçirilməsində məqsəd Vətən müharibəsində yaralanmış qazilərimizin keçdiyi döyüş yolunu, onların göstərdikləri şücaəti uşaq və gənclərə tanıtmaq, onlarda Vətənə və torpağa məhəbbət hissini artırmaq, hərbi-vətənpərvərlik ruhunu təbliğ etmək, milli-mənəvi dəyərlərimizi qorumaqdan ibarət olub.
Görüşdə qazilər döyüş təəssüratlarını məktəblilərlə bölüşüblər. Vətən uğrunda canlarını sipər etmiş qazilər şagirdlərə Vətəni sevməyi, qorumağı və hər zaman layiqli vətəndaş olmağı tövsiyə ediblər.
3A sinifinin müəllimi Lalə Məmmədzadə çıxış edərək bildirib ki, belə görüşlər məktəblilərdə vətənpərvərlik hisslərinin formalaşmasında mühüm rol oynayır. Onun sözlərinə görə, şagirdlərin qəhrəman qazilərlə görüşü onların yaddaşında unudulmaz iz buraxacaq, qazilərin göstərdiyi igidlik isə məktəblilər üçün əsl həyat dərsi olaraq daim tədris prosesində yaşadılacaq.
Tədbirin sonunda şagirdlər vətənpərvərlik mövzusunda şeir və mahnılar səsləndiriblər.
