Təhsil Nazirliyi tərəfindən elan olunan təhsildə inkişaf və innovasiyalar üzrə ikinci qrant müsabiqəsinə layihə təkliflərinin qəbulu başa çatıb.
Qeyd edək ki, fevralın 14-də dövlət ümumtəhsil müəssisələri və təşkilati-hüquqi formasından asılı olmayaraq bütün ümumi təhsil müəssisələrində çalışan pedaqoji işçilər üçün təhsildə inkişaf və innovasiyalar üzrə qrant müsabiqəsi elan edilib.
Nazirlikdən bildiriblər ki, müsabiqə çərçivəsində ümumtəhsil müəssisələri kateqoriyası və fərdi kateqoriya üzrə ümumilikdə doqquz yüzədək layihə təklifi qəbul edilib. Bu təkliflər əvvəlcə texniki ekspertizadan keçiriləcək. Müsabiqə meyarlarına və kriteriyalarına uyğun gələn təkliflər ekspert qrupu tərəfindən qiymətləndiriləcək. Təşkilat komitəsi ekspert qrupunun rəyi əsasında dəstəklənməsi məqsədəuyğun sayılan layihə rəhbərlərinin adlarını aprelin sonunda Təhsil Nazirliyinin veb-saytı vasitəsilə elan edəcək.
Təhsildə inkişaf və innovasiyalar üzrə qrant müsabiqəsinin keçirilməsinin başlıca məqsədi təhsil müəssisələrində və təhsilverənlərdə sağlam rəqabəti və innovativ fəaliyyəti stimullaşdırmaqdır. Müsabiqə müasir tələblər baxımından məktəbdaxili rəhbərlik və nəzarətin təkmilləşdirilməsi, pedaqoji işçilərin peşəkarlıq səviyyəsinin yüksəldilməsi, məktəb-icma (valideyn) münasibətlərinin təşəkkülü və inkişaf etdirilməsi, keyfiyyətin idarə olunmasında müasir qiymətləndirmə vasitələrinin tətbiqi, istedadlı uşaqlarla işin təşkili və ümumilikdə doqquz mövzu üzrə keçirilir.
