Abşeron Rayon İcra Hakimiyyətinin və Təhsil Şöbəsinin birgə təşkilatçılığı ilə rayon ərazisində fəaliyyət göstərən təhsil müəssisələrində “Azərbaycan Respublikasında plastik qablaşdırma tullantılarının ətraf mühitə mənfi təsirinin azaldılmasına dair 2019–2020-ci illər üçün Tədbirlər Planı”nın 2.2.3-cü bəndinin (Təhsil müəssisələrində ictimai məlumatlılığın artırılması istiqamətində tədbirlər görülməsi) icrasının təmin edilməsi məqsədilə "Plastik qabların zərərləri" adlı sislilə maarifləndirici tədbirlər keçirilib.
Tədbirlərin keçirilməsində məqsəd şagirdləri plastik qablar haqqında məlumatlandırmaq və onların zərərləri barədə biliklərini artırmaqdan ibarətdir.
Maarifləndirici görüşlərdə çıxış edənlər hazırda ətraf mühiti çirkləndirən əsas faktorlardan birinin də plastik qablaşdırma tullantıları olduğunu bildiriblər.
Qeyd edilib ki, plastik tullantılar təbiətdə yüz illər ərzində parçalanmır, miqdarı isə ilbəil artır. Araşdırmalar göstərir ki, bu tullantılar düzgün idarə olunmadığından ətraf mühiti çirkləndirir, kənd təsərrüfatı torpaqlarının dərin qatlarına keçərək bitkilərin normal inkişafını ləngidir və məhsuldarlığın aşağı düşməsinə səbəb olur.
Vurğulanıb ki, bir çox inkişaf etmiş ölkələrdə plastik qablaşdırıcılardan istifadənin azaldılması istiqamətində müvafiq qanunvericilik bazası yaradılır, onların toplanması və təkrar emalı sistemi təkmilləşdirilir. Avropa ölkələrinin bir çoxunda əsas tədbir kimi plastik torbaların ödənişli olması və ya onlara ekoloji vergi tətbiqi kimi üsullardan istifadə edilir. Bununla yanaşı, dəfələrlə istifadə oluna bilən parça torbalardan, bakteriyaların və ya digər canlı orqanizmlərin parçalaya biləcəyi çantalardan istifadənin təşviqi də görülən tədbirlər sırasındadır.
Görüşlərdə həmçinin məktəblilərinin ünvanladığı suallar ətraflı cavablandırılıb
