Abşeron rayonu, Saray qəsəbə 4 nömrəli tam orta məktəbdə Azərbaycan xalqı üçün əbədi qürur və şərəf mənbəyi olan 8 Noyabr – Zəfər Gününün 5-ci ildönümü və 9 Noyabr – Dövlət Bayrağı Günü münasibətilə təntənəli tədbir keçirilib. Tədbirdə şəhid ailələri, qazilər, məktəbin rəhbərliyi, müəllim və şagird kollektivi, eləcə də valideynlər iştirak ediblər.
Tədbir Azərbaycan Respublikasının ərazi bütövlüyü və suverenliyi uğrunda canlarını fəda etmiş şəhidlərin əziz xatirəsinin bir dəqiqəlik sükutla yad olunması və Dövlət Himninin səsləndirilməsi ilə başlayıb. Daha sonra çıxış edənlər xalqımızın qəhrəmanlıq salnaməsində əbədi yer tutan 8 Noyabr – Zəfər Gününün tarixi əhəmiyyətindən danışıblar. Bildirilib ki, bu gün müasir Azərbaycanın gücünü, xalqın birliyini və dövlətin qüdrətini simvolizə edən qürur günüdür.
Çıxışlarda qeyd olunub ki, Müzəffər Ali Baş Komandan İlham Əliyevin rəhbərliyi ilə rəşadətli Azərbaycan Ordusunun qazandığı bu şanlı Qələbə təkcə torpaqlarımızın azadlığı deyil, həm də milli qürurumuzun, birliyimizin, əzmkarlığımızın təntənəsidir. Şagirdlərə Zəfər Gününün tarixi, Vətən müharibəsində qazanılan nailiyyətlər, Azərbaycan Ordusunun dünya hərb tarixindəki yeri barədə geniş məlumat verilib.
Tədbirdə şagirdlər vətənpərvərlik ruhunda şeirlər söyləyib, ədəbi-bədii kompozisiyalar nümayiş etdiriblər. Onların ifasında “Şuşa Qarabağın tacıdır!”, “Qarabağ Azərbaycandır!”, “Şəhidlər ölməz, Vətən bölünməz!” kimi şüarlar səsləndirilib, Vətən sevgisi, qəhrəmanlıq və milli qürur hissi tərənnüm olunub.
Məktəbin müəllimlərinin rəhbərliyi ilə şagirdlər daha sonra İkinci Fəxri Xiyabanı ziyarət ediblər. Burada Azərbaycanın Milli Qəhrəmanları general-mayor Polad Həşimovun, Mübariz İbrahimovun və İkinci Qarabağ müharibəsində şəhid olmuş digər qəhrəman oğullarımızın məzarları ziyarət olunub. Məktəblilər, müəllimlər və valideynlər şəhidlərin əziz xatirəsini bir dəqiqəlik sükutla yad edib, məzarları üzərinə gül dəstələri düzüblər.
Ziyarətin məqsədi gənc nəslin milli ruhda tərbiyə olunması, tariximizin və qəhrəmanlarımızın tanıdılması, onların xatirəsinə daim ehtiramla yanaşmaq zərurətinin aşılanması olub. Tədbir iştirakçıları vurğulayıblar ki, bu gün hər bir azərbaycanlı Zəfəri bizə bəxş edən şəhidlərin qəhrəmanlıq yolunu dərindən öyrənməli, onların ruhu qarşısında baş əyməli və bu müqəddəs tarixə sahib çıxmalıdır.
Saray qəsəbə 4 nömrəli məktəbin kollektivi tərəfindən keçirilən bu tədbir həm Zəfər Gününə, həm də Dövlət Bayrağı Gününə həsr olunmuş qürur dolu bir vətənpərvərlik dərsi kimi yadda qalıb.
