Xırdalan şəhər 8 nömrəli tam orta məktəbdə Azərbaycan xalqının milli birliyinin, qürurunun və qəhrəmanlığının simvolu olan 8 Noyabr – Zəfər Gününün 5-ci ildönümü və 9 Noyabr – Dövlət Bayrağı Günü münasibətilə təntənəli tədbir keçirilib. Tədbirdə məktəbin pedaqoji kollektivi, şagirdlər, valideynlər, şəhid ailələri və Vətən müharibəsi qaziləri iştirak ediblər.
Tədbir Dövlət Himninin səsləndirilməsi və Vətən uğrunda canından keçən şəhidlərin xatirəsinin bir dəqiqəlik sükutla yad olunması ilə başlayıb. Daha sonra məktəbin direktoru Mahnur Hüseynova çıxış edərək bu tarixi günlərin Azərbaycan xalqı üçün xüsusi mənəvi əhəmiyyət daşıdığını bildirib. O qeyd edib ki, Prezident, Müzəffər Ali Baş Komandan İlham Əliyevin rəhbərliyi altında rəşadətli Azərbaycan Ordusu torpaqlarımızı işğaldan azad edərək xalqımıza illərin həsrətini yaşadan qələbəni bəxş edib. “Bu qələbə hər bir azərbaycanlının qəlbində qürur, həmrəylik və dövlətinə sonsuz inam hissi yaradıb,” – deyə məktəb direktoru vurğulayıb.
Daha sonra məktəbdə təhsil alan şəhid övladlarının ifasında “Mənim atam qəhrəmandır” mahnısı səsləndirilib. İfa tədbir iştirakçılarını duyğulandırıb, şəhidlərə olan sonsuz ehtiram və minnətdarlıq hisslərini bir daha yaşadıb. Tədbirin bədii hissəsində şagirdlər vətənpərvərlik mövzusunda şeirlər söyləyib, vətənə məhəbbəti tərənnüm edən mahnılar oxuyublar. Gənc rəqqaslar tərəfindən hazırlanan vətənpərvərlik ruhunda rəqs nömrələri tədbirə xüsusi rəng qatıb.
Məktəbin foyesində şagirdlərin hazırladığı əl işləri və “Şuşa, sən azadsan!” adlı rəsm sərgisi nümayiş olunub. Həmçinin Zəfər Gününə həsr olunmuş divar qəzetləri və fotoguşələr sərgilənib. Tədbir çərçivəsində “Sən azadsan, Şuşa” mövzusunda keçirilən inşa müsabiqəsinin qalibləri təltif olunub, onların yazılarında ifadə olunan vətən sevgisi və qürur hissi yüksək qiymətləndirilib.
Vətən Müharibəsi qazisi Vasif Allahverdiyev çıxış edərək döyüş xatirələrindən söz açıb, gənclərə Vətənə sədaqətli, dövlətinə bağlı və milli ruhlu övladlar kimi yetişməyi tövsiyə edib. Qazi qeyd edib ki, bu gün azad, müstəqil və güclü Azərbaycanda yaşamaq uğrunda minlərlə qəhrəman şəhidimiz canından keçib, onların hər biri xalqımızın yaddaşında əbədi yaşayacaq.
Tədbirin sonunda məktəbin kollektivi və şagirdlər Zəfər Gününün Azərbaycan tarixində dönüş nöqtəsi, milli qürurun və əzmkar ruhun təcəssümü olduğunu vurğulayıblar. Sonda “Şəhidlər ölməz, Vətən bölünməz!”, “Qarabağ Azərbaycandır!” şüarları səsləndirilib, vətənpərvərlik ruhunda mahnılar ifa olunub.
Bu cür tədbirlər gənc nəslin milli-mənəvi dəyərlər əsasında formalaşmasına, şəhid və qazilərimizin qəhrəmanlıq yolunun gələcək nəsillərə çatdırılmasına xidmət edir.
