2026-cı ilin “Şəhərsalma və Memarlıq İli” kimi elan edilməsi ölkəmizdə həyata keçirilən inkişaf siyasətinin yeni mərhələyə qədəm qoyduğunu nümayiş etdirir. Bu yanaşma artıq şəhərlərin yalnız estetik baxımdan yenilənməsi ilə məhdudlaşmır, daha geniş anlamda insanların gündəlik həyat şəraitinin yaxşılaşdırılmasını, təhlükəsiz və funksional mühitin formalaşdırılmasını hədəfləyir. Müasir dövrdə şəhərsalma anlayışı sosial rifah, ekoloji tarazlıq və keyfiyyətli təhsil imkanları ilə sıx bağlı şəkildə inkişaf edir.
Bu strateji xəttin təməlində Ulu Öndər Heydər Əliyev tərəfindən müəyyən edilmiş dövlətçilik fəlsəfəsi dayanır. Onun insan kapitalına verdiyi xüsusi önəm, təhsili milli inkişafın əsas dayaqlarından biri kimi qiymətləndirməsi bu gün də ölkənin inkişaf kursunda öz əksini tapır. Məhz həmin yanaşma nəticəsində təhsil sahəsi yalnız sosial sahə deyil, eyni zamanda strateji prioritet kimi formalaşıb.
Hazırda bu siyasət İlham Əliyev tərəfindən müasir çağırışlara uyğun şəkildə davam etdirilir. Son illərdə ölkə üzrə genişmiqyaslı məktəb tikintisi həyata keçirilmiş, köhnə təhsil müəssisələri əsaslı şəkildə yenilənmiş və müasir texnoloji imkanlarla təmin olunmuşdur. Dövlət başçısının regionlara müntəzəm səfərləri zamanı təhsil ocaqlarına xüsusi diqqət yetirməsi və yeni məktəblərin açılışında şəxsən iştirak etməsi bu sahənin dövlət siyasətində prioritet mövqeyini bir daha təsdiqləyir.
Eyni zamanda, Birinci vitse-prezident Mehriban Əliyeva tərəfindən həyata keçirilən sosial təşəbbüslər təhsil mühitinin daha da təkmilləşdirilməsinə mühüm təsir göstərir. Onun təşəbbüsü ilə reallaşdırılan layihələr nəticəsində bir çox yeni məktəb binaları inşa edilmiş, mövcud təhsil müəssisələri yenidən qurularaq müasir standartlara uyğunlaşdırılmışdır. Bu addımlar təhsilin əlçatanlığını artırmaqla yanaşı, onun keyfiyyət göstəricilərinə də müsbət təsir edir.
Aparılan bu siyasətin real nəticələrini Abşeron rayonu üzrə müşahidə etmək mümkündür. Son illərdə rayon ərazisində çoxsaylı təhsil müəssisəsi yenilənmiş, bir sıra məktəblər isə tamamilə yeni formatda istifadəyə verilmişdir. Xırdalan, Mehdiabad, Masazır, Hökməli və Saray kimi yaşayış məntəqələrində həyata keçirilən layihələr nəticəsində müasir təhsil infrastrukturu formalaşdırılmışdır. Bu yeniliklər minlərlə şagirdin daha komfortlu və texnoloji imkanlarla zəngin mühitdə təhsil almasına şərait yaradıb.
Təhsil infrastrukturunun yenilənməsi özünü nəticələrdə də göstərir. Şagirdlərin müxtəlif bilik yarışlarında və imtahanlarda əldə etdikləri nailiyyətlər artan inkişafın göstəricisinə çevrilib. Müasir tədris metodlarının tətbiqi və beynəlxalq təcrübənin öyrənilməsi gənclərin daha rəqabətqabiliyyətli formada yetişməsinə imkan verir.
İşğaldan azad olunmuş ərazilərdə aparılan quruculuq işləri isə bu siyasətin daha geniş miqyasda tətbiq olunduğunu göstərir. Burada yaradılan yeni təhsil müəssisələri müasir şəhərsalma prinsiplərinə uyğun şəkildə layihələndirilir və gələcək nəsillər üçün dayanıqlı inkişaf modelinin əsasını qoyur.
Beləliklə, şəhərsalma ilə təhsil siyasətinin paralel inkişafı artıq təsadüfi deyil, məqsədyönlü strategiyanın tərkib hissəsidir. Bu vəhdət həm urbanistik mühitin yenilənməsinə, həm də cəmiyyətin intellektual potensialının güclənməsinə xidmət edir.
Aydın görünür ki, həyata keçirilən bu ardıcıl və məqsədyönlü siyasət nəticəsində ölkəmizdə formalaşan müasir təhsil və yaşayış mühiti gələcək nəsillərin daha sağlam, təhlükəsiz və yüksək dünyagörüşlü şəkildə yetişməsinə geniş imkanlar açır. Bu istiqamətdə atılan addımlar Azərbaycanın dayanıqlı inkişafının əsas sütunlarından biri kimi öz əhəmiyyətini daha da artırmaqdadır.
Mahnur Hüseynova,
Xırdalan şəhər 8 nömrəli tam orta ümumtəhsil məktəbinin direktoru
