Cəbhənin Tərtər rayonu istiqamətində erməni silahlı qüvvələrinin həyata keçirdiyi təxribatın qarşısını alarkən şəhid olan Azərbaycan ordusunun əsgəri İbrahimov Mahmud Azər oğlunun 40 mərasimi keçirilib. Mehdiabad qəsəbəsində düzənlənən mərasimdə Abşeron rayon İcra Hakimiyyətinin başçısı İradə Gülməmmədova ilə yanaşı yerli hüquq-mühafisə orqanlarının, idarə müəssisə, təşkilat rəhbərləri, Müdafiə Nazirliyinin əməkdaşları, həmçinin, şəhidin yaxınları və sakinləri iştirak ediblər.
Şəhidimizin ailə üzvlərinə başsağlığı verən İ.Gülməmmədova torpaq uğurunda şəhid olmağın ən ali, uca zirvə olduğunu bildirib. Azərbaycan əsgərinin qüdrətinin, gücünün cəbhədə gedən son döyüşlər zamanı qazanılan uğurlardan bir daha bəlli olduğunu deyən İ.Gülməmmədova vurğulayıb ki, torpaqlarmızın azadlığı uğrunda silahlı qüvvələrimizin Ali Baş Komandanı cənab İlham Əliyevin əmri ilə hər bir Abşeronlu döyüşlərə hazırdır.
Mərasimdə Şəhidin atası Azər İbrahimov vətənə xidmətin hər bir övladın borcu olduğunu deyərək, şəhid oğlu ilə fəxr etdiyini bildirib.
Sonra çıxış edənlər şəhidin vətən uğrunda canından keçdiyini, əbədiyyətə qovuşduğunu bildirərək, Azərbaycanın ərazi bütövlüyü uğrunda aparılan döyüşlərdə ordumuzun yanında olduqlarını qeyd ediblər.
Şəhid Mahmud İbrahimovun Hərbi xidmətdə fərqləndiyinə görə medalı atasına teqdim olunub.
Daha sonra şəhidin ruhuna ehsan verilib.
Qeyd edək ki, 1997-cü il təvəllüdlü Mahmud İbrahimov 2015-ci ildə Cəbrayıl rayon Hərbi Komissarlığı tərəfindən həqiqi hərbi xidmət çağırılıb.
Allah şəhidimizə rəhmət eləsin!