23 avqust 2016-cı il tarixində Sumqayıt şəhəri ərazisində yerləşən Xüsusi Dövlət Mühafizə Xidmətinin regional şöbəsində Xüsusi Dövlət Mühafizə Xidməti əməkdaşlarının peşə bayramına həsr olunmuş tədbir keçirilib.
Tədbirdən öncə Abşeron Rayon İcra Hakimiyyəti başçısının müavini İlham Quliyev,Sumqayıt şəhər icra hakimiyyəti başçısının müavini Sahib Quliyev və Xüsusi Dövlət Mühafizə Xidmətinin Sumqayıt regional şöbəsinin əməkdaşları ümummilli lider Heydər Əliyevin xatirəsinə böyük ehtiram əlaməti olaraq ulu öndərin abidəsi önünə gül dəstələri qoyublar.Daha sonra toplantı iştirakçıları Sumqayıtın Şəhidlər xiyabanına gedərək, ölkəmizin azadlıq və istiqlaliyyəti uğrunda döyüşlərdə mərd mübarizlər kimi həlak olmuş Vətən şəhidlərinin xatirəsini ehtiramla yad ediblər.
Xüsusi Dövlət Mühafizə Xidmətinin Sumqayıt regional şöbəsində baş tutan tədbiri giriş nitqi ilə açan regional şöbənin rəisi mayor Vasif Əsgərov onlara hər zaman göstərilən diqqət və qayğıya görə Ölkə rəhbəri, Ali Baş Komandan cənab İlham Əliyevə öz minnətdarlıqlarını bildirib. Xüsusi Dövlət Mühafizə Xidmətinin yaranma tarixi haqqında qısa məlumat verib. Hər zaman dövlətçiliyimizin qorunmasında, dövlətə, xalqa, Prezidentə sadiq, layiqli və qüsursuz xidmət edəcəklərini bildirib.
Daha sonra çıxış edən İlham Quliyev ilk öncə bütün şəxsi heyəti Abşeron Rayon İcra Hakimiyyəti başçısı İradə Gülməmmədovanın adından səmimi qəlbdən təbrik edib. Qeyd edib ki, son zamanlarda Xüsusi Dövlət Mühafizə Xidmətinin inkişafı və maddi-texniki bazasının gücləndirilməsi, əməkdaşlarının peşəkarlığının artırılması istiqamətində mühüm işlər görülmüşdür. Xidmətin ayrılmaz hissəsi olan Milli Qvardiya müasir standartlara uyğun olaraq yenidən qurulmuş, şəxsi heyətin hərbi-döyüş qabiliyyəti artırılmış, mənəvi-psixoloji hazırlığı və nizam-intizam yüksək səviyyədə təşkil edilmişdir. Ölkəmizdə irimiqyaslı regional enerji layihələrinin həyata keçirilməsi və bu enerji layihələrin təhlükəsizliyinin təmin edilməsi zərurəti ilə əlaqədar ümummilli liderimiz Heydər Əliyev tərəfindən ixrac neft və qaz boru kəmərlərinin təhlükəsizliyinin yüksək səviyyədə təşkil və təmin edilməsi məhz Xüsusi Dövlət Mühafizə Xidmətinə tapşırılmış və səlahiyyətləri əhəmiyyətli dərəcədə genişləndirilmişdir.
Toplantıda çıxış edən S.Quliyev bildirib ki,Xüsusi Dövlət Mühafizə Xidməti şanlı döyüş yolu keçib. Azərbaycan Respublikasının ərazi bütövlüyü uğrunda gedən döyüş əməliyyatlarında XDMX hərbi qulluqçuları da şərəflə iştirak etmiş, qəhrəmanlıq nümunələri göstəriblər. Torpaqlarımızın düşmən tapdağından azad olunması uğrunda gedən döyüşlərdə XDMX hərbi qulluqçularından 13 nəfəri şəhid olub, 21 nəfər itgin düşüb, 55 nəfəri isə müxtəlif dərəcələrdə yaralanıb. Yaralanan hərbi qulluqçularımızdan 15 nəfəri əlil olub.
Tədbirin sonunda nümunəvi xidmətinə görə seçilən bir neçə hərbi qulluqçu Abşeron rayon İcra hakimiyyəti və Sumqayıt şəhər icra hakimiyyəti tərəfindən fəxri fərman və qiymətli hədiyyələr ilə təltif olunublar.Bundan başqa regional şöbəyə Abşeron rayon İcra hakimiyyəti başçısının adından smart televizor hədiyyə olaraq təqdim edilib.
Şamo Əliyev
